股海實戰：華創長揸博財息兼收

市場關注西班牙賣債情況，投資者入市意欲持續低迷，兩地魚缸偏軟，港股成交僅486億元。個股有壞消息，對股價嘅影響可以放大幾倍；有好消息，股價又未必會有太大反應，呢啲就係大淡市嘅寫照﹗喺咁嘅市況，短炒股票抑或期指都咁難搵食，唔想損手爛腳，就要戒急用忍！

重慶政治事件正在發酵，中央開始清查地方債務，投資者聞「重慶」色變。重農行（03618）股價跌到唔識停，尋日再挫6.5%。早前收到表叔電郵，叮囑要避開一隻從事貸款及融資業務嘅創板股，事關呢隻股喺重慶設有小額貸款融資業務，佢話目前國家對呢個新興行業嘅監管尚未完善，公司能夠進入重慶，當然係同地方政府關係良好，但往日嘅優勢今日可能已變成負累，所以千祈唔好多手咁話。究竟講緊邊隻股，就由得大家自己估吓。

今年以來，內地食品及飲料股吸引避險資金進駐，中國旺旺（00151）及統一企業（00220）股價均創五十二周高，啤酒股青啤（00168）股價亦已由上月下旬低位回升12%。講到呢類股，阿莊又想起愛股華潤創業（00291），隻股三月中旬公布業績前見高位30.8元，之後調整至上月底低見26.35元後回穩，尋日收報27.5元，逆市升1.1%。

阿莊認為，華創股價回番落26至27元水平，可以再翻兜，事關避險資金流入，將繼續支撐呢類股嘅估值，再睇華創本身嘅零售業務具規模，而且身為大紅籌，亦唔怕好似民企咁會關門大吉。此外，金威啤酒（00124）洽售啤酒資產一事，相信季內會有結果，華創係大熱門得主，可以順道博吓有好消息跟尾。不妨喺27元邊或樓下分注收集，中線目標睇30元樓上，25元水平乃兩年支持位。公司派發末期息每股0.32元將於五月二十九日除淨。季內大市有咩大波動，呢隻股輸極有個譜，長揸啱Timing嘅話，仲可以財息兼收。

Tip股我至Top

Sammi（4/13）Tip

三一國際（00631）

最多升10%

錢進（4/12）Tip

聯想（00992）

最多升6%