樓市出更：寶翠車位月租8千夠誇

近排各類物業身價全線上升，尤其係市區車位同核心零售區舊樓，升勢更凌厲，據聞西區寶翠園有車位以月租8,000元天價租出，令業主更加心雄，最近就有車位以276萬元賣出，係近兩個月兩度破頂；同時，依家屋苑有車位叫價已高達350萬元。

自從今年初南區聚豪居車位價突破咗240萬元之後，多個屋苑做價屢創新高，好似寶翠園提供2,000幾個單位，但車位只得約500餘個，加上唔少車位仲係大業主保留收租，令市場流通量極低，真係有錢都未必買到，令到屋苑車位價兩個月兩度破頂，好似屋苑L5樓有個雙號車位，最近以276萬元新高價賣出，原業主揸咗唔夠兩年，帳面賺81萬元，升幅約42%。

寶翠園車位同住宅比例失衡係租、售價持續高企嘅原因之一。中原黃廷傑同劉Sir講，寶翠園大業主雖然有車位出租，但數量有限，唔少住客輪候多時都無車位用，惟有以高價向持有車位嘅二手業主埋手，以致有車位以8,000元天價租出，足夠係新界區租個小型單位。依家寶翠園車位放盤只得約3個，叫價由280萬去到350萬元。

牽晴間兩日連掃3車位

至於九龍站亦係車位租、售價愈做愈高嘅地區，美聯彭文浩話，該區以凱旋門車位最值錢，但依家真係有錢都買唔到，事關暫時無散車位放售，至於車位租盤都只得3、4個，月租現時叫價介乎4,500至5,500元，部分成交月租去到4,800元，而擎天半島同漾日居就平啲，月租約莫3,000幾元。六福行吳家榮話，近期有投資者都轉投車位市場，好似有個投資者喺兩日內用咗百幾萬連入粉嶺牽晴間3個車位，每個購入價介乎42萬至45.7萬元。

銅鑼灣舊樓12年升20倍

除咗車位外，零售核心區舊樓升幅都不容忽視，好似銅鑼灣勿地臣街7號全幢，上個月以2億元賣出，比起二○○○年購入價只係950萬元，十二年足足升咗二十倍；據註冊處資料，新買家係駿魁發展有限公司，間公司嘅董事包括陳春發、林黎明、林春生。據聞，該幢住宅樓高約5層。