Fundman睇市：達芙妮難享高估值

無寶不落的高盛，趁市場對人行第二、三季擴大放水規模的樂觀願景，內銀股紛紛死貓彈之際，減持25億美元的工行（01398）股份，得到一向對內銀情有獨鍾的淡馬錫垂青，無形中把減持的消息由負面變番中性，是尋日港股跌幅比預期溫和的主因。不過，歐豬債問題始終揮之不去，滙控（00005）又跌穿雙頂阻力頸線67.3元，短期走勢似要朝着63至64元方向走。

經濟放緩供過於求，內地鋼價持續下滑，鐵礦石採購成本調整遠遠追唔上。鞍鋼（00347）發盈警，話第一季可能要蝕18.88億元（人民幣．下同），去年公司蝕21.63億，即係今年一季已等於舊年全年損失嘅八成七！鞍鋼一○年賺20.54億元，舊年一鋪蝕凸，唔少賓架都預咗今年上半年唔樂觀，只係估唔到差成咁，尋日股價跌0.15港元，報5.31港元。

鞍鋼股價繼續沉淪

睇番鞍鋼去年長短債共340億，淨負債對EBITDA由三年前的2.7倍升到7.7倍，雖然早前改會計準則減低折舊，但今年業績紅轉黑仲係無咩希望。一般銀行見到盤數咁樣一定坐立不安，但本地投資者卻深明「不要問只要信」的投資國企心態，國有銀行長期向國企傾斜，資金無限量支持，鞍鋼去年利息19.2億，相當於5.6厘成本左右，比唔少內地巨型民企至少7至8厘融資成本低一截。毫無疑問，政府唔會畀鋼鐵業巨人倒下，但鋼鐵業黑暗未見盡頭，看來鞍鋼頗有潛力向去年十月低位走近一點。

達芙妮（00210）剛剛公布比同行跑贏一條街的營運數據，首季同店銷售按年增長22%，仲獲幾間大行出報告唱好，估唔到管理層立即把握時機出貨，執行董事陳怡勳以每股11元（港元．下同）配售3,000萬股，消息令股價昨日插水，開11元後最低見10.66元，收10.88元，接貨者即日帳面又要輸錢。

去年下半年，多隻零售業領袖股，同店銷售表現都較預期遜色，管理層對租金及薪酬壓力的展望不表樂觀，高估值馳名的零售板塊，「集體估值萎縮」後顯得反彈乏力，如今連異數達芙妮，管理層都趁高出貨，試問何處是樂土？

○七年百盛（03368）市盈率曾高達七十倍，隨着盈利增長由當年近47%，回歸到過去三年平均10%，市盈率也拉回17.3倍，大行估計今明兩年複合盈利增長回到17至20%，計落PEG尚算在一倍合理範圍。茂業（00848）情況也相似，不過較低增長預期下，股價要有大作為唔易。春天百貨（00331）屬便宜之選，市盈率10.8倍，但增長由過去五年的32%至196%，一百八十度轉變至去年倒退近8%，落差之大實在嚇人，果然係平得有道理。

至於達芙妮，22間大行17間畀買入評級，頗一面倒，只係平均目標價11.91元，較現價只高一蚊左右，筆者覺得唔係佢交唔到數，只係內需股周街跳樓貨，分析員要畀高溢價唔容易，都係等批股消化咗至算。