股海實戰：中國南車上望6元關

港股悶局一場，恒指高低波幅僅111點，扣除有大型配股上板嘅工行（01398）全日成交211億元，大市成交額僅412億元。家陣先至係次季初段，股指唔上唔落，成交低迷嘅日子真係苦了經紀同炒家！

內地首季GDP、三月份M2及銀行新增貸款數字均高於預期，係咪可以視為首季內地經濟成功探底，阿莊認為言之尚早，但有一點可以肯定嘅就係，中央對經濟發展步伐盡在掌握之中。依上大人嘅語調推斷，目前經濟情況受控，但內房調控未到位，估計真正復甦可能要等到末季十八大後始會出現。次季中港兩地股市繼續行上落市嘅機會大，短炒依然唔容易，但中長線則可留意喺低位建倉嘅機會。

金風有機博反彈

鋼鐵行業處周期性低谷，鋼鐵股盈警在意料之內。鞍鋼（00347）就首季業績發盈警，股價跌2.7%。聽聞工信部正醞釀新政策協助鋼鐵業進行重組改革，正由於政策因素存在，這解釋了為何行業已陷入全面虧損局面，但「空軍」仍未敢去到盡！

金風（02208）剛就首季業績發盈警，消息拖累股價尋日一度插穿4元關。執筆期間，傳來海外消息指，包括金風等兩家內地風電整機商有意收購丹麥同業維斯塔斯（Vestas）。金風現為全球風電整機商老二，若消息屬實，有望藉此挑戰一哥地位。有海外收購消息刺激，短線股價喺3.8至4元區域找到支持嘅話，不難吸引炒家進場博反彈。

舊年多災多難嘅中國南車（01766），總算捱過艱難日子。畢竟內地鐵路機車仍由北車同南車兩大集團壟斷，去年南車仍賺38.64億元人仔，按年增長52%，情況較想像中好。

展望今年，內地鐵路行業投資增長放緩，但出口市場持續增長，有助抵銷相關影響。城軌地鐵板塊業務值得憧憬，去年南車喺內地市場嘅佔有率近70%。近日京、滬、渝將啟動城軌車輛招標，估計定單金額約40億人仔，相信南車又可以分一杯羹。此外，公司高層指，正就收購多個歐洲國家同業嘅可能性進行磋商，且看年內能否開花結果。

以南車現價計，往績市盈率13.9倍，息率約3.9厘，管理層明言傾向維持派息比率以留住股東，現價估值可攻可守。公司將於下周二宣布首季度業績，此前喺5.2至5.3元水平可以小注一試，博半年結前可上試6元關，順道收埋息（派末期息每股0.18元人仔喺六月一日除淨），支持位4.99元未宜有失。

Tip股我至Top

黃瑋傑（4/10）Tip TCL多媒體（01070）最多升9%

錢進（4/5）Tip 旺旺（00151）最多升6%