樓市出更：投資老手月掟5豪宅

二手樓市升勢銳不可當，有投資者就趁勢連環沽貨套現，有一個資深新盤豪宅投資者，不足一個月以嚟連沽至少5個豪宅單位，成功套現咗逾1.11億元，而新賣出嘅物業包括一幢大埔比華利山別墅及東涌海珀名邸洋房，成交價分別約2,100餘萬及約1,950萬元。

呢位早年玩開東涌樓嘅資深投資者，近年開始買豪宅新盤，估計曾經揸住成5億貨喺手，加加埋埋大約有廿個單位，但由上月下旬開始，就積極出貨，前排就率先賣出咗西南九龍帝峯．皇殿、九龍塘尚御同海珀名邸洋房等單位。

海珀名邸倒蝕350萬

有代理同劉Sir爆料，呢位投資者近期再陸續賣出部分單位，好似以約2,100萬元沽出比華利山別墅湖景道雙號屋，間屋面積大約3,100幾方呎計，呎價逾6,600元，比○七年購入價帳面蝕逾530萬元，據聞，呢間屋一直用作長線收租，最近租約期滿先至轉租為售套現。

同一個投資者嘅海珀名邸洋房，早幾日亦賣咗。東涌物業李順康話，賣出嘅海珀名邸雙號屋，面積近3,200方呎，連租約以約1,950萬元轉售，呎價約6,100元。

據了解，新買家買入間屋，打算暫時收住租先，等租約完咗就收番間屋自己住。據資料顯示，間屋喺前年以約2,300萬元買入，今次轉售帳面要蝕成350萬元，而呢位投資者喺同屋苑已經冇晒貨。

雍怡雅苑劈百萬成交

由於政府曾經出口術，所以市場亦零星出現低價成交。利嘉閣馮兆永話，大埔洋房雍怡雅苑，近日有間C型單號屋累減150萬元，以1,750萬元賣出，面積3,228方呎，呎價5,421元，低市價8至10%；原業主前年1,638萬元入貨，連全屋裝修，就算帳面賺112萬元，估實際落袋唔多。