Fundman睇市：城電睇唔通掂唔過

尋日港股大部分時間處悶局，A股反而由頭升到尾，滬綜指最後以全日高位報收，重上2,350點，升1.8%，強勢原因，到四點後才真相大白，人民銀行公布三月份新增貸款1.01萬億元（人民幣．下同），同比多3,320億元，也超越市場預期上限，看來A股的春江鴨真係唔少。

三月份新增貸款，是一一年一月份以來最高單月紀錄，M2廣義貨幣供應增長，亦由13%升至13.4%，向着人行全年14%增長目標行近一步。美銀美林經濟師陸挺認為，新增貸款數字顯著反彈，意味中國經濟最壞時刻，可能在三月份見底，第一季經濟增長，可能會稍高於佢原先估計的8.3%。

恒指連跌三日後，反彈186點，報20,327點。經過昨日反彈，恒指前日在20,188至20,297點留低的下跌裂口完全補回，技術上，再彈的目標係21,760至20,035點跌浪的0.236及0.382反彈阻力，分別在20,442及20,694點。

城電（01137）以50億元（港元．下同）賣掉現金牛電訊業務，全身投入免費電視生意，單係套現筆錢，就比目前市值36.3億元高出三成七，公司表明將當中20億元以特別股息派番畀股東，等於每股至少攞到2.5元，消息後股價掃高去到5.61元，可惜尋日反高潮，街外博財息兼收嘅勇士，焗住要做電視大亨！

話說回頭，電視一向係燒銀紙玩意，特別息收完之後，揸住25億玩免費電視有幾「襟燒」？今日傳統電視行業，面對愈來愈多跨媒體挑戰，史提芬自己同唔少朋友睇Youtube頻道的時間，遠多過傳統免費電視。電視本身係高資本高風險生意，遠的不提，壹傳媒（00282）在台灣搞電視蝕到嘔，而二十年前投資數以十億的有線電視，近幾年焗住天價搶英超播影權留客，成績表經已四年見紅，亞洲電視亦係一個老闆蝕完換第二個，試問電訊魔童靠甚麼破除港人開電視例必禁「1」的習慣？

數碼通和電更吸引

儘管過往在長途電話及寬頻業務上都創出奇迹，但老實講今次筆者真係唔太樂觀，畀我揀，做開台初期大花銀彈下的首批觀眾，都唔做佢股東，計落派息後，大約相較剩餘現金值折讓35%，以一盤唔知蝕幾耐的生意而言，仲未夠吸引。

不過呢單交易也帶來一些投資啟示，在資訊爆炸下，電訊服務逐漸變得不可或缺，無論固網定係無線網絡，收費經歷長時間的壓力後，開始見底回升，買家對電訊資產價值的前景看好。以城電這間香港第二大寬頻商為例，擁客200萬戶，去年純利3.1億，收購者出價相當於16.1倍市盈率，或者投資回報大約6.2%。睇返數碼通（00315）及和電（00215），按一二年預期盈利，盈利回報率分別約為5.8%及6.9%，當然筆者絕對相信，郭家、李家唔會輕易割愛，但現水平入市，同大孖沙睇中香港寬頻預期回報相距不遠，如果電訊業前景真係咁好，大家可以齊齊分享成果。