樓市出更：佳士得攻亞豪宅頭炮香港

香港樓價貴已經世界知名，尤其升值潛力優厚嘅豪宅物業，吸引不少國際企業進軍本港豪宅市場。據劉Sir所知，佳士得國際地產舊年正式喺香港成立，仲係踏足亞洲區嘅第一個據點，公司亦啱啱同領域測量師行成為合作夥伴，未來一年會瞄準台北、東京及新加坡等多達40個有發展潛力的亞洲地區。

劉Sir同佳士得公關吹開水，佢話公司一直都有地產部專門代理歐洲豪宅，但近年愈來愈多香港同內地人到海外置業，所以決定發展亞太區房地產業務，佢話公司舊年喺香港成立佳士得國際地產，正式投入本港豪宅市場，主要從外地引入客人來港置業，或者介紹外地豪宅予本港買家。

冀提升貴價樓市佔率

佢仲話，其實佳士得大約二十五年前已經來港設立公司，不過主要搞吓拍賣會，舊年先正式喺香港成立子公司，作為踏足亞洲豪宅市場嘅首個據點。而公司同領域測量師行成為合作夥伴，前者易名為領域佳士得國際地產，將來會致力發展亞洲區房地產業務，包括打算未來一年進軍台北、東京及新加坡等地。

領域佳士得國際地產行政總裁許賡勝話，同佳士得合作傾咗約一年，因近年唔少本港投資者已向海外物色機會，九七後國際好多投資者來港投資物業，兩公司合作可增加盤源及有效運用資源，將業務推向新層次。

佢仲話，過往領域業務包括豪宅租買及估值、專業諮詢工作兩大範疇，未來業務不變，透過合作目標將在港逾千萬元豪宅市場佔有率，由2%升至4%。領域原本員工約四、五十人，未來一年冀可增兩至三成人手。

港豪宅呎價亞洲一哥

其實亞洲地區舊年豪宅價格走勢都唔錯，睇番萊坊數據，好似市場較關注喺北京同香港豪宅價格，舊年就按年升8.1%同4.6%。而香港豪宅平均呎價亦以34,320元，穩居全球第4位，仲係亞洲區嘅「一哥」。

另據利嘉閣數據顯示，三月份35個指標豪宅錄187宗成交，按月升咗約21%，創十四個月新高，而加權樓價指數亦按月升約2%至153.64點，超越去年八月高位，創出新高。