樓市出更：北角地王人人寄厚望

政府早前已事先張揚會將「曬太陽」多年嘅前北角邨東面部分大型商住地，納入新財政年度首季主動賣地名單中，料最快可在五月份推出市場招標，雖然幅地加入咗限量元素，但有測量師認為幅地始終係港島區絕無僅有臨海地，相信對區內樓價及發展有推動作用。地皮推出在即，有部分北角居民已表示開始响區內物色單位作投資用途。

呢幅前北角邨商住地係新財政年度嘅「重頭戲」，韋堅信測量師行估價部董事林晉超同劉Sir講，本港有質素嘅土地買少見少，而前北角邨商住地鄰近港鐵北角站，加上有海景，勾地表入面已經無同類供應。佢仲話，政府透過改變土地用途，將來有新嘅港島臨海地供應都未定，但要有咁大規模就相信少啲。

靚海景可建分層豪宅

佢話政府就港島東海旁展開研究，相信可完善區內交通發展，地盤潛力可以充分發揮，有機會對區內以至港島東嘅樓價產生帶動作用。不過，現階段地皮未有具體嘅發展詳情，所以仲要視乎政府最終公布嘅出售章程，但相信地皮具有發展空間，可打造成豪宅檔次分層住宅，再配合商場等周邊設施，預期大型發展商會對土地積極作出研究。

和富業主想買樓收租

事實上，區內居民亦對呢幅咁優質嘅商住地「寄予厚望」，好似北角和富中心居民吳先生話：「依家住緊嘅單位係自置物業，相信地皮可帶動周邊樓價升溫，所以會考慮買多間用作收租。」

至於租住北角單幢住宅嘅韋小姐話：「區內樓價真係好硬淨，部分單位早兩年仲係做緊220萬元，依家已經升到300萬元，對於入唔入市仲十五十六，因為樓價太高。」對於前北角邨商住地，佢話呢類臨海地皮會刺激樓市向好，預期樓價難以大跌。

劉Sir同大家複習一下，呢幅前北角邨商住限量地，係勾地表入面滾存地皮，地盤面積約251,882方呎，屬一項集合住宅及商場等大型綜合發展，總樓面料約84.5萬方呎，其中美聯估計每方呎樓面地價大約1萬元，估值約84.5億元，係現時市場估值上限。

前北角邨商住地皮基本資料

地皮：前北角邨東面部分商住地

佔地：約251,882方呎

總樓面約845,190方呎

市場估值：約84.5億元

每方呎樓面地價：約1萬元

街坊睇法

吳先生：預計可帶動周邊樓價升溫

韋小姐：將刺激樓市向好，樓價難大跌

馬先生：會在港島區物色單位收租