股海實戰：領匯收租股避險首選

長假前港股交投淡靜，唔少大戶本周仍在休假，故唔排除要到下周魚缸人氣先至復常。民企是非沒完沒了，上周傳來「民企之父」辭任民生國際（00938）高層，拖累股價急跌9%，另報道引述渾水指正就民企制訂研究報告，真係遲唔講、早唔講﹗呢期不妨睇實民企成交及沽空異動，話唔定真係有人乘機「摸魚」﹗

客觀嚟講，民企資金鏈不及國企紅籌，企業管治和經營等水平良莠不齊，去年下半年以來環球經濟明顯轉差，民企嘅抗逆能力受考驗，交唔出成績表，某程度應該係意料之內！但阿莊深信，民營企業乃中國經濟發展不可缺少嘅部分，近年上大人便不斷提及鼓勵民間資金進入銀行、能源等板塊，故亦不宜一竹篙打晒一船人！呢次民企股再起風暴，阿莊認為不理好醜短炒博反彈嘅行為風險太高，策略只宜（目及）實有往績支持、有能力承擔風浪嘅優質民企股，捕捉中長線執平貨嘅機會。

福田長情客得個吉

福田實業（00420）獲中紡入主，上周四股價急升15.9%，收報1.09元。類似呢啲獲國企買盤嘅大刁，聽落好似係能令人發大達嘅大消息，但事實卻係兩回事。阿莊就識得一位老友記，一○年初經已收到風話中紡在港「獵物」，當時福田股價都係1.2元水平咁上下，到依家才成事，係咪大股東睇淡行業前景，不得而知，只係知道呢位老友記揸咗兩年有多，好消息等到了，但都係得個「吉」﹗

首季本港樓市現小陽春，年內餘下時間樓市會係點，變數甚多，特別係新特首上位後，房市政策有待觀察。地產係香港經濟支柱，天下間那有聰明人會搬石砸腳？撇除政策因素，未來一年多低息環境持續，今年龍B潮及婚嫁潮出現，用家主導下樓市可望穩定發展。

講到呢度，又講番隻領匯（00823），今年二月推介過，現價冇咩大變，股價硬淨，皆因收租業務穩定，最低工資可以間接推動公屋商場消費，加上今年公屋加租，停車場同商舖租金亦會跟住加。雖然唔可以講七月後政策面會毫無變化，但唔使諗咁遠，先諗掂第二季，領匯仍可視為避險佳選。若然好似舊年翻版，即喺六月初公司宣布年度業績前股價行轉快嘅，咁就當係BONUS！

Tip股我至Top

藺俠（4/3）Tip恒指瑞信熊（61173）最多升53%

錢進（4/3）Tip中國中鐵（00390）最多升10%