樓市出更：炒家殺入居屋鑊氣盛

居屋做價屢創新高，早前樂富富強苑一個三房單位，以天價500多萬元成交，令市場嘩然。代理界朋友話，近月樓市大旺，全城求盤若渴，好多市區居屋入場門檻已經大幅跳升，好似牛池灣瓊山苑，依家入場費已經升到成230萬元，比農曆新年前有低於200萬元嘅選擇，現貴咗超過18%。

一向畀人感覺實惠嘅居屋，近期係咁創高價。劉Sir同代理老友傾開，佢地都話，絕大部分筍盤平盤已經被掃清光，依家好多居屋入場費同過年前相差十幾萬元，甚至幾十萬元，富誠地產陳錫金話，瓊山苑依家最平係A座一個高層單位，面積495方呎，自由市場價叫價約230萬元，比農曆新年前只約195萬元，大幅高出達18%。

投資客比例佔四成

佢仲話，瓊山苑買嚟投資收租嘅比例，由以往十幾個巴仙，升到三、四成，近排有個外區投資客，以235萬元自由市場價買咗C座高層一個單位，打算用作收租，呎價4,747元。

世紀21富山何美英話，鑽石山龍蟠苑入場費亦較農曆新年前上升超過一成，依家最平係B座一個低層單位，面積約462方呎，連約以235萬元自由市場價放售，呢類型單位過年前只係叫緊約210萬元，仲要係交吉有樓睇添。該行黃澤龍話，黃大仙翠竹花園11座中層A室係屋苑入場單位，面積約480方呎，依家自由市場價叫價約220萬元，農曆新年前呢類兩房單位，只係賣190多萬元，依家升咗一成三。

新界居屋樓價偏穩

不過，新界西北區嘅居屋走勢相對較平穩。祥益黃慶德講開屯門，佢話龍門居現最平係9座低層E室，自由市場價叫價約170萬元，呎價約3,366元，兩個月前同類單位放緊160多萬元，依家只叫高約幾個巴仙。

至於仲有唔少200萬元以內居屋供應嘅粉嶺區，創富物業盧詠芹亦指，好似欣盛苑中層兩房單位，依家自由市場叫價約180萬元，與過年前相若。