Fundman睇市：中央壓樓價口硬心軟

今日A股復市，但近期港股對外圍敏感度較低，恒指周二急升268點。黃金交叉之後又話死亡交叉，恒指喺幾條移動平均線之間穿插，毫無指標作用，反而保力加通道頂部同底部有明顯阻力同支持，各位可以作為短線參考。

中國三月份官方PMI及美國ISM指數報喜之後，中國三月份非製造業指數亦升到58，放完假之後中國首季GDP會唔會有驚喜？自從阿爺話放棄「保八」之後，坊間好似當今年GDP一定「冇八」咁款，但目標同實際係兩回事，所以唔好咁快睇死。

本地地產股周二大反彈，新地（00016）兩個老細出來亮吓相，起碼可以令投資者個心定啲，但朝早升過兩蚊托起大市嘅中移（00941）則由升轉跌，個市不能因一日反彈而樂觀得太早，正如恒指喺上周二亦曾挾升378點，但跟住亦要再尋底。

昆能（00135）同金界（03918）加入抽水行列，反應當然係前者比後者好得多，金界係大股東賣舊股，昆能則擺明發展新業務，所以股價低開後慢慢回升。每日例行要做民企股檢討，周二不少暴跌民企股翻生，例如永暉焦煤（01733）、達進（00515）等，但永暉條數睇到你一頭霧水。繼續沉淪嘅有銀基（00886）、人和（01387）等，旭光（00067）彈一日就玩完，今次內傷之後應該醫番都手尾長。

周二內銀升得唔錯，但升得最勁係內房，一放長假就傳出減RRR消息。事實上，今年內地樓價雖下降，但氣氛好過舊年下半年好多，三月北京新樓成交比二月升咗四成，一來發展商肯減價，積累咗幾個月嘅購買力開始爆發，二來內地放寬首套房按揭，證明中央「有打有壓」。

雖然阿爺三令五申遏制樓價，但業內認為只係口硬心軟，樓市上牽地方債務同銀行不良貸款兩大炸彈，下涉眾多周邊行業，包括代理、廣告、建築材料等幾十種，中國剩得推動內需呢招去保增長，只要樓價唔好咁離譜，阿爺都會隻眼開、隻眼閉。

中海宏洋財力充裕

中國人對買樓情有獨鍾，皆因銀紙可以亂印，但地皮始終供應有限，而祖國同胞薪酬上漲之速度其實跑贏通脹，所以遲早有承接。地產商無疑已過咗盆滿缽滿時代，但只要肯薄利多銷嘅話，依然大把錢途。不過，地產業無疑要經過洗牌階段，財力不足者要賣資產，而龍頭公司則可以執平貨，所以幾時都係買龍頭股最穩陣，何況中國海外（00688）同華潤置地（01109）呢類大粒佬，波幅亦一啲都唔細。

如果都係覺得藍籌股升幅唔夠喉，又驚民企股條數有問題嘅話，亦可以考慮中海個仔中海宏洋（00081），上個月仲發咗22億元CB，截至去年底淨負債比率僅22.9%，今後肯定會大舉買地，預期今年會增加300萬平方米土地儲備。