股海實戰：騰訊追貨考膽色

本周港股假期氣氛濃厚，市況淡靜係意料中事，指數亦容易被舞高弄低。周二恒指便抽高268點收市，報20,790點。新地（00016）兩位是非主角與傳媒見面以穩定人心，對股價有支持作用，連帶其他本地地產股亦借勢反彈。不過，若扣除昆侖能源（00135）及金界控股（03918）有配股上板，大市實際成交僅521億元。

昆能靜候佳音

講番昆侖，周二阿莊話想買番兩萬股，撞啱配股消息震跌股價，遂以平均價每股13.5元買入兩萬股，料此股距離落實新收購項目之日不遠。參考一○年末季，昆侖宣布收購母公司資產前後股價抽高三成，相信今年亦會有大製作，可靜候佳音。

假期表叔朋友例牌來港消費，難得一聚，阿莊當然把握機會問問行情。聽講呢期上大人為咗重慶事件搞到頭都大，首季經濟表現又遜於預期，能否實現今年嘅增長目標，次季能否止跌回穩頗為關鍵。表叔並叫阿莊留意，往年次季內銀嘅新增貸款多數低於首季，但若然今年一改常態，對提振信心有一定作用，加上本季政府大力催谷消費，所以唔使睇得太淡咁話！

個股方面，周二高盛發功，將騰訊（00700）嘅評級調高至買入，目標價大幅調高35%至270元，消息刺激其股價曾高見223.4元，收報222.8元，升2.8%。查實上月中旬，騰訊股價升穿205元後，好快升至220元水平，以騰訊「晒士」之大，能夠興風作浪嘅都係大孖沙。論基本因素，騰訊嘅業務獨特，且已確立領導地位，長遠可以視為新興產業股嘅核心之選。之不過，其股價自去年十一月至今累計升幅已有六成。日後要見到高盛所定嘅目標價，唔係冇可能，只係此前必有一番好淡角力。現水平跟進，要做好心理準備股價隨時回吐一兩成，先至好上車！

Tip股我至Top

史提芬（3/28）Tip

恒安國際（01044）最多升12%

黃瑋傑（3/28）Tip

馬鞍山鋼鐵（00323）最多升11%