樓市出更：東九商廈差兩蚊撼尖咀

過去幾年九龍東大變天，好似昔日工廠林立嘅觀塘及九龍灣，依家已經成為新興商業區，租金仲追貼尖沙咀。劉Sir睇番代理行嘅數據，上個季度九龍東寫字樓平均呎租差唔多31元，同舊年同期相比，升咗接近7%，升幅仲係期內眾區之冠，同尖沙咀嘅呎租只係相差兩元。有代理老友估計，今年內九龍東寫字樓平均呎租好有機會同尖沙咀睇齊。

其實戴德梁行每季都有份報告，係講番最新寫字樓走勢。報告指出，喺二○一○年之前，九龍東寫字樓平均呎租都只係20多元都唔夠。不過，舊年次季開始，該區每季平均呎租保持喺31元水平。

創紀5期全層月租79萬

有代理話，九龍東寫字樓租金持續上升，原因之一係中區等傳統寫字樓區供應少，加上租金高，所以唔少租戶都「過江」九龍東搵單位，刺激租金上升，其中觀塘創紀之城5期中層全層，面積約2.55萬方呎，啱啱以每方呎約31元租出，月租約79萬元。

近幾年尖沙咀寫字樓吸引力大不如前，自一○年第二季起，該區寫字樓租金連升五季後，即去年第三季平均呎租錄約35元後，之後租金開始下滑，上季平均呎租只企穩約33元，較去年同期升約3.1%。

東九空置率連降五季

另一個支持九龍東寫字樓租金上升嘅原因係供應少。一○年第二季該區空置率錄得11.2%高位後，之後連續五季回落，直至舊年第三季錄得3.5%，過去兩季亦只輕微回升至3.6%。

戴德梁行大中華區策略發展顧問部主管陶汝鴻就話，今、明兩年九龍東將有6個寫字樓項目相繼落成，總樓面約130萬方呎，由於買家中多以用家為主，相信唔會令市場租盤大增。另外該類寫字樓質素高，其租金可睇高一線，故預期九龍東寫字樓租金今年有機會接近尖沙咀水平。