股海實戰：交行實力值得信賴

內地股市浸浸落，國企紅籌冇運行；民企股好似患流感，頻頻出事；再來隻老牌藍籌拉閘，連帶其他藍籌都發軟蹄，真係屋漏兼逢連夜雨！與其愁對魚缸，倒不如繼續翹埋雙手睇大電影，繼「選舉風雲」後，新上演有「豪門恩怨」﹗

尋日跟一班經紀談及財金「計王」呢次有難，還想起當年「計王」當官時，煽風點火將聯交所同證監會兩位頭頭玩到團團轉，如今終於一次因為「計」多闖禍！講到主管財金嘅官員，唔少經紀都在打聽，究竟嚟緊會係邊個做港交所（00388）主席同證監會主席，兩者大熱門人選分別係周文耀同查太。聽班經紀話，若然搵到熟悉本地證券市場運作嘅周文耀出山，咁經紀業界就有番希望喎！

民企股衰開有條路

市況冇咩好講，單字一個「淡」，國美（00493）如期再跌，照計落到1.3至1.4元水平，會有股海清兵入市博反彈。民企風暴繼續，人和（01387）、達進（00515）、春天（00331）及理士（00842）跌幅均逾一成，另歲寶（00312）下晝停牌，而繼寶姿（00589）因延發業績而停牌，尋日又輪到澳優（01717），總之衰開有條路！

阿莊聽聞，班外資見嚟緊幾個月中國政、經挑戰多多，加埋呢期民企爆到噼嚦啪啦，心死之下暫時撤出中國地區。股海水退，短線看官都係咪諗咁多，放兩、三個禮拜大假，等復活節長假完結後再算！

好友冇咩話題，呢期吹風話可以博吓長假前後人行會再減存備率，但其實人行行長已講明，減存備率唔等於貨幣政策變得寬鬆，只係若然外資撤出中國嘅影響過大，為平衡風險，官方再減存備率又或者出口術挺經濟亦唔出奇，但要搞清楚咁做目的係平衡淡風，而非要大灑金錢催谷。

萬一次季真係再減存備率，也許可對內銀股起支持作用。環顧一眾內銀股，若然配股計劃順利進行嘅話，交通銀行（03328）會係相對穩陣嘅選擇。事緣據其管理層所講，未來三至四年都毋須要再對外集資，咁就唔使擔心公司再有批盪活動，未來亦有望回復正常派息。

以其正常每年每股派息0.2元人仔計，現價預測息率4.2厘；再假設今年盈利只係平穩，預測PE唔到六倍，市帳率1.3倍，加埋喺國際金融業有豐富經驗嘅大笨象（00005）作為主要股東幫手(目及)實盤數，即使嚟緊「中國」板塊再起波瀾，呢個估值應該經得起考驗。

Tip股我至Top

積奇（3/28）Tip

山水水泥（00691）

最多升10%

藺俠（3/29）Tip

恒指摩通熊（60394）

最多升10%