股樓雙拼：荃灣工貿貨貴10%等住拍

中國銀行廣東開平支行前行長許超凡等人，因為涉嫌挪用巨額公款，而被法院下令出售其名下多項物業抵債，下個月初將再推出餘下物業，當中包括荃灣有線電視大樓5批共7伙，部分單位開價比舊年明顯升咗唔少，相信係與毗鄰嘅ONE MIDTOWN呎價升到達4,100多元有關。

早前被法院下令出售抵債嘅荃灣有線電視大樓等物業，剛安排推出餘下單位透過拍賣出售；餘下未推出單位全為有線電視大樓，包括5批共7伙，分布响高層7A、7B、8、9、10及12號室，每批單位面積由2,681至3,418方呎，每批開拍價由675至2,142萬元。

有線大樓舊年搶高19%

劉Sir發現，比較舊年曾經推出拍賣嘅同物業高層單位，今次部分單位開價明顯高咗唔少。睇番舊年九月法院令拍賣嘅嗰批許超凡等名下部分單位，當時有線電視大樓高層8室及9室兩伙，開價分別為630萬元及661.5萬元，每方呎分別只係2,287元同2,294元。對比下月初推出嘅同一樓層12室，今次拍賣開價675萬元，折合呎價達2,518元，明顯升咗一成。

今次部分單位比上次低一層嘅8、9、10號單位，開價每呎高逾2,500元水平，高於舊年層數高一層嘅單位。上述8、9、10號單位今次同一批推出，面積共8,541方呎，拍賣開價2,142萬元。舊年推出嘅有線電視大樓兩伙，分別獲搶高11.6%及19.6%賣出，成交價703萬元及791萬元。

近年唔少工貿樓做價亦都節節上升，除咗因為工商舖唔受額外印花稅影響，亦係因為受到毗鄰新落成嘅物業開售帶動，好似隔籬荃灣嘅ONE MIDTOWN咁，最高呎價已經超過4,100元，相信亦帶動有線電視大樓被睇高一線。

麗晶車位扯貴36%拍出

車位物業亦受追捧，九龍灣麗晶花園17座單號車位，昨以24.5萬元透過拍賣行交吉沽出，較拍賣開價18萬元，高36%。