Fundman睇市：放水有偈傾股市自然醒

聯儲局主席伯南克前晚出席講座時明言美國失業率改善速度唔夠快，顯然要催促其他鷹派聯儲局成員，放棄加息念頭，返去再諗諗QE3的可行性。

如非善忘，兩星期前伯蛇已話過，過去幾次美國以寬鬆措施挽救經濟的經驗，每每都係衰在退市過早，結合兩次講話，推QE3看來只屬遲早問題。

推QE的先決條件，係通脹低、股市及經濟數據轉差，以QE1、2經驗，每次印錢都推高美國通脹接近2%，二月美國CPI在2.9%水平，如果QE3唔係美國媒體流傳般以沖銷形式推出，按目前高於目標通脹2%的情況下，立即推，條件未配合，不過睇周一美股表現，淨係出吓口術都已經夠威力。

三月滙豐中國製造業採購經理指數跌到48.1，貸款需求疲弱，由息口走勢可見一二。六個月期上海銀行同業拆息，從二月初近5.415厘，跌到尋日5.11厘，人行可能短期內會再減存備金率或提早減息。

憧憬美國放水，前晚所見，美元弱，金價反彈，股市勁升，會係一日貨仔抑或長炒長有，有待觀察，但高位回落過千點的港股，就終於可以借外圍轉勢反彈，尋日收市升378點，報21,046點，可惜成交極奀，主板得551億元，即市波幅得167點。期指炒家見歐洲期貨開高，三月份期指等現貨收市後，愈挾愈狂，十五分鐘時間挾高120點，最後以21,154點收市，高水108點，沽空比率第7日上升，去到12.2%，即使減番民生銀行（01988）批股，未收到貨先沽空鎖定利潤的5.1億元沽盤，沽空比率仲有11.2%，看來周四結算前，好淡雙方會有一番龍爭虎鬥。

恒安（01044）派成績表，賺26.49億元，增長8.6%，符合預測中位數。期內，營業額升27%，達破紀錄的170.5億元，但因紙漿價格去年上半年高企，拖累毛利率從一○年的44.3%降至39.9%。

恒安有條件炒復甦

以一間估值達三十三倍的公司，卻只得單位數的增長，難免令人質疑值唔值，但見尋日股價不跌反升，大致可以知道大孖沙的答案。史提芬尋日特登去問分析員老友點睇，佢話近期內地內需及消費類股份業績瓜多過菜，像恒安這種四平八穩的，一定會有捧場客，尤其紙漿價一一年上半年去到高峰，基數較低，中期業績一定好睇，推銷比客嗰陣大把古仔。

將恒安一一年業績拆開上下半年嚟睇，毛利率由上半年的38.59%升至41.09%，但同過往一般的43至46%仲係有距離。再搵國際紙漿價睇睇，由去年六月高位回落大約17.6%，以存貨大約有兩季滯後的時間差，到今年第二、三季，恒安毛利率應該可以恢復舊觀，一二年度預測市盈率25.8倍，對比過去三年的廿二至三十六倍歷史波幅，只係中下游水平，或者對普羅股民來說，以高估值買入70多元的股票，會有心理負擔，但基金經理睇法唔同，佢地炒復甦概念，如果能升穿76.85元阻力，未來一年挑戰90元甚至進身紅底股，機會存在。