股海實戰：中海集運小注炒波幅

德國對加注救市嘅態度軟化，加埋美國聯儲局伯老再出口術，令投資者重燃對QE3嘅希望，前晚美股高收，港股亦藉此打破悶局，恒指反彈378點，重上21,000點樓上，收報21,046點，成交回升至552億元，下月期指高水110點。不過，大市沽空比率進一步上升至12%，其中中資建材股沽空額明顯增加，持有呢類股嘅股民宜睇位鬆綁，而唔係再繼續追貨。

聽做零售業嘅老友話，唔少同行捱埋呢個月都關門大吉，皆因產品加價一成都難過登天，但租金就不斷加，仲未計難請人同來料不斷漲價。另一位投資中環某老牌著名酒樓嘅老友都話，業主加租兩倍，酒樓大股東已年過七十，自問博唔過，惟有賣盤了事。顯然，高樓價已成為香港經濟持續發展嘅絆腳石，如何有序解決呢個問題，係特區新班子嘅當務之急！

中國信貸漸見鑊氣

民生銀行（01988）尋日復牌，其沽空額增至5億元，相信與接貨者未收到貨但率先沽貨食胡有關。至於另一隻宣布配股集資嘅遠東宏信（03360），股價跌穿配股價收場。阿莊認為，放貸公司集資係好事唔係壞事，皆因只要妥善控制信貸風險，愈放得多街數，利息收入自然愈高。尋日見到同類嘅中國信貸（08207）亦有炒味，有心理準備炒到咁上下又會有批盪活動。

航運股氣氛亦唔錯，尋日中遠太平洋（01199）升2.8%，勝獅（00716）升11%，將於今日宣布業績嘅中海集運（02866）亦升6.1%，收報2.6元。中海集運一月已就去年度業績發盈警，預計會轉盈為虧。但見其股價由一月份低位1.68元抽到上本月高位2.88元，顯示市場已消化去年績差嘅消息。隨着歐洲危機得到紓緩，美國經濟持續出現復甦兆頭，投資者對行業及公司前景嘅睇法亦有所改善。

年初以來，反映乾散貨運費嘅波羅的海指數由低位反彈，但升勢能否持續尚有待觀察。最近大行瑞信就亞洲區航運業發報告，評價亦趨於正面。去年一直睇淡航運股嘅阿莊就相信，今年未必會再出現去年下半年嘅急跌場面，但復甦進度則尚待觀察。若想沾手相關股份，只宜小注短炒。針對中海集運，短線可喺2.4至2.9元嘅波幅區內炒上落，亦不妨留意業績中公司對今年業務展望嘅睇法。

Tip股我至Top

錢進（3/26）Tip

海隆控股（01623）

最多升9%

積奇（3/21）Tip

光大國際（00257）

最多升7%