樓市出更：超甲廈租金季縮一成

近排有部分業主為盡快租出單位，都劈租吸客，劉Sir收到風，中環國際金融中心2期依家每方呎叫租最高去到180元左右，同舊年年中最高呎租睇200元比，平咗10%。戴德梁行份報告都話，今季中區商廈使用量大縮水，空置回升，租金受壓，期內中區超甲級寫字樓呎租按季插水11%。

有代理行老友同劉Sir講，依家寫字樓租務市場愈嚟愈難做，租客好多都話唔急於提早傾租，令到唔單止小業主話要減租，個別發展商大業主都要調低意向租金吸客。

國金2期空置率升至5%

聽講中環國際金融中心2期空置率有5%左右，比起舊年年中的1%情況大不如前，業主都調低租金吸客，舊年年中呎租大約叫190至200元，依家個別單位呎租最低170元，高層海景單位呎租大約都係叫緊180元。

今年樓市小陽春未惠及寫字樓市場。戴德梁行大中華區策略發展顧問部主管陶汝鴻話，截至本周一，中環及金鐘區寫字樓使用量，本季暫錄負增長逾29萬方呎，重返二千年初科網股泡沫爆破及○三年沙士嗰陣。至於本季上述區域空置率跌到6.4%，按季增1.1個百分點外，亦重返○五年第四季高位。

中環地舖貴1.4倍洽租

陶氏表示，中區超甲級平均呎租約137元，按季低11%，而中環同金鐘平均呎租亦只約111元，按季跌7.5%。

另外，市傳中環娛樂行一個原由連鎖時裝品牌租用嘅巨舖，劏成兩間舖後，最後D舖獲每月約200萬元洽租，若兩宗租賃屬實，新月租共550萬元，較前高逾一倍。皇后大道中雙號地下及低層部分，獲時裝品牌以每月約1,200萬元洽租，較現租高1.4倍。