Fundman睇市：民行估值吸引有得諗

特首選舉後，連跌多日嘅地產股終於見死貓彈，整體而言，港股仲係缺乏新的炒作藉口，聯儲局主席伯南克仲明示暗示無QE3，港股季結前夕，大市成交愈玩愈縮。

恒指昨日原地踏步，收20,668點，主板成交跌至442億元，是兩個半月以來最低，值得留意，沽空佔大市成交比例，在過去六個交易日由8.23%升至11.4%，連續四日企於雙位數字，淡友開始肆無忌憚，看來除非有震撼的好消息，例如中國減息或者QE3捲土重來，否則要高位季結，機會有點渺茫。

太子黨失勢急散貨

由人行二月減存款準備金率翌日，恒指高開21,760點以來，指數約累積千一點跌幅，只係5%左右，可是不少中資股同期跌幅相當誇張，部分有代表性股份，跌幅均遠高於大市，例如安徽海螺（00914）跌20.2%、恒大（03333）跌19.7%、重農行（03618）跌18.5%，一度炒核電重啟的東方電氣（01072）都要跌13.3%。周末飯局，從投行賓架得到路邊社消息，話近日內地地下錢莊水緊外，部分中資股陰陰乾下跌，背後同太子黨失勢，散水回朝有關，消息話撤資進行得如火如荼，係真係假無法證實，但客觀環境是祖國在兩會中提到放棄保八，跟住業績期見光死又佔大多數，三月中國PMI同新增貸款數字又可能令市場失望，短期只宜抱大大聲細細注心態，等調整完成，明顯支持出現先至入市。

農行（01288）業績唔好，主要係第四季較預期高的撥備，唔少人擔心其他內銀會照辦煮碗，齊齊「盡撇」，之後工行（01398）及建行（00939）達標，疑慮稍為紓緩，可是伸手集資補充資本的陰魂始終未散。交行（03328）得到一班策略股東關照，可以做到要錢得嚟不假外求，不過上星期公布業績的民生銀行（01988）就冇呢支歌唱，昨高掛免戰牌，宣布以上周收市價折讓4至7%配股集資，集資額介乎110億至114億元。

為了要達到8%的資本充足率要求，民行管理層早已放風，考慮在內地發CB或者在H股市場批股應付，市場早已有心理準備。意外反而係一日之內先後收三個卜架朋友電話，問有冇興趣買啲，唔使講都估到外面反應唔係咁熱烈。講到底，高盛手上工行解禁後隨時要錢唔要貨，而按第三、四季業績推斷，四大行中，農行今年要錢機會極大，其餘三間，就算今年唔伸手，亦難保一三、一四年唔會。再數落去，明日業績後，招行（03968）亦大有機會步交行及民行後塵。咁嘅環境，芬佬難免要酌量減磅等折讓價接貨，形成內銀股愈跌愈質的惡性循環。

從基本面睇，批股後民行的資本充足比率升返去8.3至8.4%的安全線樓上，最大不明朗因素消除，新股雖造成6%的攤薄效應，但一二年股東資本回報率18%，市帳率一倍左右，綜合而言估值幾吸引，昨日無人Call你唔緊要，如果復牌開出批股價水平買得到，不妨諗諗。