股海實戰：聯想可中長線收集

特首選舉曲終人散，雲霧撥開，地產股尋日全線回升，之不過，恒指變動不大，全日高低波幅唔夠兩百點，且大市成交降至只有445億元。目前恒指牛證重貨區收回價介乎20,100至20,599點，街貨量接近15億份，後市殺落屠牛嘅可能性不低。反正阿莊手頭冇貨，最理想係等大戶廝殺過後，恒指落番兩萬點邊，先至慢慢執平貨。

民行加入伸手行列

內銀陸續派成績表，尋日民生銀行（01988）停牌，有待公布集資事宜，引發市場憂慮內銀集資潮開始，拖累股價走低，最差係重農行（03618），跌幅近半成，另農行（01288）同中行（03988）沽壓亦唔細。

講到農行，過去半年有多嘅反彈行情，一直未能突破阻力區3.8至4元，近期10日線又再跌穿50日線，走勢唔對路，仲未到撈底時候。

尋日建議留意內地消費促進月概念股，今日又講講聯想集團（00992）。尋日其股價走強，收報6.94元，升幅3.7%。截至去年度十二月底止季度，聯想喺全球同內地PC市場份額雙雙創新高，距離全球PC一哥寶座只差兩個百分點嘅市佔率，今年首兩個月股價最多累升四成，正好反映其業務發展嘅大好勢頭。

為保全球PC市場一哥地位，惠普打消了出售PC部門嘅想法，最近更宣布將打印機同PC部門合併，但顯然，單靠削減成本同裁員去支撐盈利表現，實非長久之策，故投資者對此頗有保留。對手「技窮」，相比之下，聯想嘅業務發展強勢無法擋。優勝劣敗，令兩者身價如玩搖搖板遊戲，一降一升。過去一年，惠普股價累跌四成多，市值蒸發300多億美元，而同期聯想股價則累升六成，市值升30多億美元。

超越惠普指日可待

事實上，平板電腦應用以及企業辦公室電子化已成大趨勢，打印機市場嘅增長亦開始放緩，如何處理打印機同PC兩大業務，仍然係惠普管理層頭痛嘅問題。依目前嘅形勢，估計喺截至明年三月底止年度內，聯想可順利登上全球PC一哥寶座，此前惠普出招整合打印機同PC業務，係咪想喺打印機業務仲值錢嘅時候，搭舊豬頭骨，方便日後將二者善價而沽，可能性不能抹煞。

顯而易見，近年全球PC行業大洗牌嘅過程尚未完結，聯想目前處於有利位置，股價可保持強勢，長線可繼續持有，而每逢大市震盪，引發其股價短期回吐，都可以留意中長線收集嘅機會。

Tip股我至Top

錢進（3/26） Tip海隆控股（01623）最多升8%

Sammi（3/26）Tip創科實業（00669）最多升8%