股海實戰：中化肥短線有暗湧

港股呢期真係冇運行，指數愈走愈弱唔在講，二、三線股頻頻出事，唔係延遲公布業績、核數師突然劈炮唔撈、就係上市首份業績唔兌現，個別企業「盈喜」更原來係糖衣毒藥，業績見街股價由高位掟落四成幾都夠膽死！

滙豐三月份中國採購經理指數（PMI）初值僅為48.1，弱勢喺預期之內，A股未有大變動。近日市場盛傳四月初內地將推出一系列刺激出口措施，照計唔流得晒，但刺激作用有幾大就係另一回事﹗

中移吸引春江鴨

再睇中資股業績，執筆時睇到聯通（00762）同農行（01288）業績，兩者表現均遜於預期。龍頭中資股業績如是，唔排除嚟緊重估潮將觸發大市出現新一輪跌浪。如今阿莊明白，點解先前大量資金湧入中移（00941），睇嚟大戶早已收風中電信（00728）同聯通業績燶燶哋，故及時調配長短倉，沽中電信、聯通，買中移，春江鴨邊有得輸？

近日大市沽空比率回升，係大風浪來臨前又一先兆。想跟勢沽空股票，阿莊認為奢侈品股估值仲喺相對高嘅水平，現水平做淡仲有水位。好似呢幾日見到金飾股經已散散哋，周大福（01929）股價前日創上市以來新低，六福（00590）股價亦已六連跌，揸住同類股要自求多福！

睇番業績股，中化化肥（00297）宣布去年度業績，純利6.78億元人仔，按年增長26%，但對比去年上半年已錄得純利4.96億元人仔，反映下半年情況冇上半年咁好。展望今年，三農政策繼續支持行業發展，但綜觀化肥行業總產能持續上升，競爭激烈，加上經營成本上漲，唔講得係無風無浪。

今年初，公司斥資收購磷礦資源項目，近日管理層亦披露正洽購一些海外鉀肥資產，也許購併消息可為股價帶來支持，但能否抵銷重估壓力就兩睇，特別係睇完去年度業績，相信唔少投行會下調其今、明兩年嘅盈利預估，故料短期股價尚有暗湧，且觀望1.8至2元支持再作評估。