大屋苑租金係時候升

住宅租金連跌好幾個月，二月份隨住整體市況反彈，跌幅都開始收窄，部分藍籌屋苑租金更加率先回升，有地產代理老友近期做咗個報告，十大屋苑當中，鰂魚涌太古城同藍田麗港城呎租最先回升，二月份平均呎租按月分別升咗2.2%與0.6%，根據呢個走勢嚟睇，相信三月份整體大型屋苑平均呎租有望重拾升軌。

劉Sir聽中原地產黃良昇講，根據佢哋公司新簽嘅租約統計，二月份全港85個大型私人住宅屋苑平均呎租約18.9元，按月微跌0.5%，但比一月份跌幅2.6%，已經明顯收窄咗2.1個百分點，而二月份嘅跌幅亦係舊年九月以來最少，所以估計三月份租金可望重拾升軌，逐步會補回連續五個月共8.3%嘅跌幅。

康怡上月挫5.4%最差

十大藍籌屋苑中，有兩個屋苑上月平均呎租已經率先回升，其中太古城平均呎租按月升2.2%至27.5元，是期內升幅最大嘅藍籌屋苑；而麗港城平均呎租亦升0.6%至17.1元。其餘八個藍籌屋苑租金仍然下跌，表現最差係鰂魚涌康怡花園，按月跌咗5.4%，平均呎價跌到得22.8元；其次較差係鴨脷洲海怡半島，平均呎租按月跌2.6%至18.6元。至於另外六個屋苑跌幅都低於2%。

都會馬尺呎租見23.6元

除咗十大屋苑，其實有部分區域，近期租金都陸續回升。美聯蕭銳賢話，將軍澳區本月錄到超過200宗租務成交，平均呎租約18至19元，相反不少業主轉租為售，令到今個月新收租盤只得約100個，喺求過於供情況下，租金因而被推高，個別屋苑租金更創新高。

他續稱，近日區內頻錄呎租逾20元成交，好似都會駅1座高層E室，面積約657方呎，以月租約1.55萬元租出，呎租約23.6元，屬今年區內新高，另同區新都城3期3座高層B室，月租約1.3萬元，呎租約22.7元。