牛熊對壘：建行績前炒一轉吼17213

美股跌，A股就無咩升跌，港股繼續Chok上Chok落，連續兩日即市穿過250日牛熊分界線，最終力保不失，主板成交降至612億元。一直被視為資金避險之地的美國國債遭拋售，引發市場無限暇想，究竟流出的資金去向如何，對利率走勢又有怎樣的影響，值得諗一諗。

港股昨日沽空64.23億元，佔大市成交比率升至10.49%，水平超高。聽過坊間有專家話國壽（02628）實際價值10蚊唔到，筆者唔夠膽睇咁低，但此股肯定是空軍的力沽對象，經常上榜，昨日沽空4.08億元，佔沽空6.35%，佔股份成交更高逾四成。

平時活躍的國壽輪卻見人氣下降，佔整體窩輪成交比重降至4.88%，只有4億元左右。連日下插的中移（00941）逆市升2.2%，沽空都唔少，有3.84億元，佔比5.97%，窩輪成交變化不大，錄得6.16億元。

值得注意的是，即月期指轉高水，按前日恒指衍生工具倉位，好倉實際是流入了3,656萬元資金，淡倉就有多至8,022萬元的大額資金流出，坐貨者明顯傾向睇好。近日港股成交動力不足，國指弱勢，但牛熊街貨量分布顯示，大家對後市缺乏一面倒的睇法，前日恒牛總街貨24億份，熊證就單日減少了3.2億份，令總數降至25億份，兩者相差無幾。

大市遲早爆單邊

睇番恒指即市高低波幅237點，過去五個交易日在21,454點至20,756點間區間內走動，幅度不算大，要在牛熊證市場搵食者，都較偏向高槓桿比率，收回水平較貼現價，短炒靈活走位的同時，毋忘風險，因恒指波幅指數推出以來，現時已跌至歷來最低水平區間，昨收20.86，唔多唔少反映了窩輪的引伸波幅正處低位，買輪的吸引力增加，但要慎防大市遲早爆單邊大上大落。

中資銀行股將陸續公布業績，部分股份的窩輪成交轉活，重農行（03618）業績不俗，可留意重磅的建行（00939）周五出成績，看好的可考慮建行高盛購（17213）今年七月三十日到期，行使價6.88元，實際槓桿11.52倍。