Fundman睇市：淡友開始耀武揚威

升到你唔信的美股，終於中場休息，聯儲局主席伯南克前晚話退市不能太早，結果道指由中段跌過百點，到收市只跌68點。同日，由奧巴馬提名加入美聯儲理事的哈佛大學教授Jeremy Stein，卻同伯蛇唱反調，話美國經濟復甦持續，聯儲局可能要在二○一四年前加息。

回顧去年十月，當人人以為有QE3出籠，伯南克卻以扭曲操作（OT）取代，實行沽短債買長債，推低長期利率，好等美國企業能夠取得低息融資。事隔五個月，美國經濟數據明顯改善，華爾街對經濟復甦預期升溫，過去兩星期，十年美債息由1.95厘升至前晚的2.37厘，加埋Jeremy Stein言論，似乎息口見底回升的共識開始醞釀，伯南克咁啱話不會太早退市，明顯是希望管理通脹重臨、利率回升的預期。

歐債危機拖累歐洲奢侈品市場，五大酒莊之一的拉菲（Chateau Lafite Rothschild）新釀靚年份酒價，由去年高位跌近四成，「酒災」味道濃郁。

葡萄酒交易所Liv-Ex Fine Wine Exchange數據顯示，波爾多紅酒價格，比去年六月高位累積跌19.5%。但早前酒聖Robert Parker破紀錄，一次過畀十九款波爾多佳釀100分滿分，在酒災的環境下，猶如一劑強心針，整個波爾多產區○九年酒價都見反彈，唔少去年從期貨市場入重貨的酒商一夜翻生，部分較冷門牌子的滿分酒，酒價即時升近一倍。

事實上，中國已成為波爾多紅酒最大買家，而且近年仲索性成個酒莊咁掃，最轟動係去年中糧集團盛傳以千萬歐元，買下小型酒莊Chateau de Viaud。有酒莊老闆同史提芬開玩笑，話多得中國人，一級酒價至可以去到一兩千歐元歷史高位。不過，在法國企業及老牌家族壟斷下，莊主話大陸豪客能夠買得到的酒莊，其實大部分只啱用來種薯仔。

中資股無運行，地產股在選舉前腳軟，似乎道出香港未來跟隨內地樓價合理化的預期，恒指跌31點，報20,856點，沽空佔主板成交由9.9%再升至10.4%。內銀業績前，淡友開始肆無忌憚。

康師傅偷步炒復甦

旺旺（00151）業績後創新高，筆者對康師傅（00322）抱有期望，可惜結果只賺4.2億美元，跌12%，比大行預期的4.5億美元差。初步睇，第四季業績遠差過預期，只得5,992萬美元，按年同按季分別跌23.8%及54.1%。

製作即食麵用嘅麵粉同棕櫚油，同埋飲品生產材料糖及膠樽材料PET粒子，價格統統高企，是康師傅業績不濟的主因。毛利率連續兩年收窄，由○九年高峰期的34.6%，跌至一○年及一一年的28.4%及26.5%。但隨着通脹紓緩，過往經驗話未來業績強勁反彈可期。事實以約80億美元銷售額，毛利率自高位收窄8%，相當於6.4億美元經營毛利，目前估值稍高，但市場已開始賭一二年的復甦大道，預期市盈率28.3倍，低於歷史平均值35倍一成九，成交配合下，應有可為。