股海實戰：中旅翻身希望在明年

港股尋日又係例牌三點半前後震一震，藍籌股中，中移（00941）同滙控（00005）繼續輪流做「定海神針」，本地地產股似有暗湧，短線宜暫避之。

講咗一段時間嘅地方養老金入市有進展，廣東省獲准把一千億元人仔養老金委託全國社保基金進行投資，但為免大家「表錯情」，社保隨即強調，新資金將更多配置到固定收益類產品，未有提及投資股市。不過，淡友始終多一瓣顧忌，見尋日A股終有喘息機會，滬綜指升1.38點，收報2,378點。睇圖表走勢，短線波幅介乎10日線（2,408點）及50日線（2,349點），一旦10日線跌穿50日線，可以下定決心暫時離場觀望。

電力股勿反應過敏

電力股強得一日，華能（00902）及大唐（00991）分別跌7%及5%，相對嚟講尋日提及嘅華潤電力（00836）表現較堅挺，跌2%。事緣有內地傳媒指，當局將開徵環境保護稅，屆時火電企業或首當其衝。不過，今年中央政策係減稅而唔係加稅，喺增設新稅種嘅同時，唔排除實行初期會否相應降低其他現有稅率以作平衡，故暫毋須為此作過分反應。

追隨鼓勵消費嘅國策，本來可以押注旅遊股，偏偏港股中可選擇嘅相關股份唔多，且長期缺乏人氣。香港中旅（00308）最近宣布去年度業績，承接前年開始嘅復甦勢頭，去年純利大幅增長3.48倍，至6.95億元，即使撇除投資物業重估及其他重要項目影響，純利亦增2.2倍至5.77億元。期內酒店及景區業務收入均錄得雙位數字增長，另珠海海泉灣折舊減少，致使度假區業務表現亦有所改善。

雖然業績靚仔咗好多，但阿莊維持固有睇法，就係呢家紅籌股尚未充分發揮自身優勢，資產回報率仍有好大嘅改善空間。這可從其負債比率僅18%、手持現金及等值接近35億元，每股NAV 2.28元，盈利又大躍進，但業績公布後股價仍毫無動靜而得到引證。

要收窄估值折讓，今年焦點在於分拆酒店業務以及落實新旅遊資源投資項目嘅進度。不過，要真正大翻身，可能要等到今年底或明年，當旗下珠海及咸陽海泉灣嘅旅遊房地產項目陸續進入建設期，相信屆時內房產業調控亦已近尾聲，公司藉着將度假村項目變身成會「生金蛋」嘅房地產發展項目，則醜小鴨可望變身成小美人﹗自問有耐性同有實力等候者，可以喺1.5元樓下逢低作中長線收集。

Tip股我至Top

藺俠（21/3）Tip

中聯美林購（16761）

最多升17%

徐燦傑（20/3）Tip

達進精電（00515）

最多升5%