Fundman睇市：內房股升唔起死唔去

周四，港股全日悶局，恒指收報21,353點，升45點，中午中移（00941）派成績表，賺1,259億元人民幣，增長5.2%，同綜合預測相若，但股價午後由低位抽升接近3元，原因係管理層在業績發布會上，拍心口話母公司揸住的3G及4G資產，中移只會分階段進行收購，之前擔心中移一次過花光手頭現金添置設備的疑慮一掃而空。

博士蛙（01698）核數師德勤突然請辭，民企帳目疑雲籠罩股市，最奇怪仲係證監居然可以畀博士蛙在詳細交代事件之前玩足半日，上午急跌逾三成，午後返來先停牌，心口掛個勇字的缸邊客，今次大鑊。

博士蛙 博唔博？

史提芬昨日亦曾經手痕想博反彈，因睇返上市十八個月，博士蛙集資返來成舊錢未用得盡，去年中期報告無負債之餘，手上現金、按金及債券有14.7億元人民幣，幾乎等於停牌市值35億港元的五成二，而昨日經已有近4億股易手，睇番20億股街貨中，大股東及管理層揸近14億，即係話幾乎三分二的街貨都碌過一轉，如果唔係主要股東被斬，牌面睇博得過。但今年個市難賭非常，是否要搵隻剛出事嘅醜股，來個double or nothing？當然，最後仲係冷靜戰勝衝動。

昨早市傳聞，話有剛上車的基金因為呢隻蛙而揩大鑊。回顧大半年之間，一眾鍾情消費及內需股的基金經理，可真流年不利，大隻有蒙牛（02319）、雨潤（01068），細至博士蛙都無端端出事，芬佬面對突如其來壞消息，即使公司長遠無問題，但為向客戶交代，點都要跟勢洗倉或者酌量減磅，高買低沽常矣，還望博士蛙只係個別事件，唔係其他極力挽回芬佬信心的民企，真係多得佢唔少。

雅居樂（03383）早兩日以10至10.5厘發行7億美元五年期債券，認購反應熱爆，據知超額接近八倍，最後債券以9.875厘定價。從來，公司債券同股票投資者，在投資選擇的取向上，有相當大的出入，簡單講，債券投資者只會考慮公司倒閉風險及償債能力，只要公司一日能夠如期向債券持有人派息，到期日贖回債券，已然足夠，反之買股票考慮的是未來賺錢及派息能力。另外，二手市場亦有別，股票話賣就賣，反之債券易手較為麻煩，故一直以來，債券投資者在審視投資前，一般比股票投資者深入及細心。

前日溫總表示，內地樓價同目標仲有一段距離。A股幾隻重磅內房股股價，立即下挫，本地內房股唔少在上月底見頂後，有升唔起的情況，市場對放寬調控措施的憧憬，突然變成一廂情願，睇返雅居樂股價由上月底高位10.96元，到尋日9.2元，累積跌16%，反之債券息率由去年十月的15厘樓上，縮到今日唔夠10厘，依然爭崩頭，結合股債表現，可以反映股市投資者睇今年「量跌價微跌」的情況下，內房股業績叻極有個譜，升了幾個月之後，再炒上理據唔多。不過從債券投資者的舉動可見，同○八、○九年海嘯時唔同，今浪內房周轉出問題，呈現違約風險的可能性，應該唔大。