股海實戰：匯源納入觀察名單

恒指唔上唔落，大戶輪流炒作落後藍籌托住指數，居心叵測。近期先後見到金融、內房、基建等股份進行集資，途徑包括配股、發優先股又或者係發債等，似乎大家都在把握喺音樂停頓前抽水。回想起月初話驚蟄股市轉邊，唔排除下周二春分後，恒指去向會更加明朗。

陸續有公司宣布業績，其中騰訊（00700）表現大致喺預期之內，投行睇法正面，大摩將目標價定喺230元，花旗將目標價上調至295元。阿莊計計數，騰訊現價往績市盈率回落至三十倍，考慮到如今唔係身處大牛市，加上嚟緊公司盈利年增長，講緊只係兩至三成，現價一二年預測市盈率約二十八倍，以其作為行業龍頭估值可享有溢價，以一二年預測市盈率三十倍計算出合理值為217元；最樂觀估值去到一二年預測市盈率三十五倍，即相等於253元。但無論睇幾多，阿莊認為等候股價再次回落至200元樓下才分注入市，會較值博。

啤酒股續受追捧

唔講唔知，呢個幾禮拜兩隻啤酒股股價持續做好，青島啤酒（00168）由低位39.95元升到上前日高位見45.8元；華潤創業（00291）則由28.2元抽到上尋日高位30.8元，計埋本月上旬先後起步嘅旺旺（00151）、康師傅（00322）同統一（00220），唔排除投行正為一批龍頭飲料股進行重估。

講開又講，早幾日果汁股安德利（02218）發盈喜，股價走高，連帶板塊內嘅海升（00359）、中國天溢（00756）股價都曾見異動，最慢熱嘅要算係匯源果汁（01886），尋日先至有動靜，一口氣踢高11%，收報3.33元，成交5,310萬元。

負面因素已反映

匯源主要從事製銷果汁飲品，去年中期銷售額同比增長23%，至18.26億元人仔，未計特殊項目之純利為929萬元人仔，同一基礎計，一○年同期錄得虧損6,920萬元人仔。阿莊相信，本月下旬宣布嘅去年度業績難寄厚望，但去年公司股價累跌逾六成，已反映呢項負面因素，基於預期去年已渡過最壞時刻，相信今年整體經營情況會持續改善，估值有上調空間。

尋日匯源股價創半年多高位，亦創自去年十一月以來最大單日成交股數紀錄，確有靜極思動的迹象，加上板塊氣氛良好，不妨將之納入觀察名單，留意嚟緊業績，管理層對今年展望是否對辦。作為參考，短線250日線阻力喺3.6元水平，10日線及保力加通道中軸支持同處2.93元。

Tip股我至Top

姚午齊（3/15）Tip

大成生化（00809）

最多升10%

Sammi（3/12）Tip

百麗（01880）

最多升8%