港樓價chok入全球三強

舊年唔少銀行响年中已經閂水喉，樓價亦應聲下滑，有代理行報告話，第四季香港嘅樓價指數，按季插水2.4%。不過由於基數高，本港全球房價指數按年有11.3%升幅，高企全球第三升幅最高地區。劉Sir相信，睇番近排樓市小陽春勢頭未減，今年首季指數不難止跌回升。

事實上，舊年樓市基礎條件唔差，好多人都話磚頭保值，又可對抗通脹。不過，奈何唔少銀行上半年時已達全年貸款目標，年底前幾個月，惟有閂水喉，令到唔少置業人士都食閉門羹，或者按唔足，樓市交投大減，不少業主減價先賣得出單位，樓價自然被質低。

港指數全年漲逾11%

據萊坊國際嘅報告，香港舊年第四季樓價指數按季跌2.4%，同前年第四季比，按年只係升11.3%；不過，由於香港過去五年間樓價指數累積升咗93.7%，升幅之高，僅次於中國，故按年指數升幅排名仍能企穩全球第三，與第四位的印度，成為首五位唯一兩個亞洲城市或國家。

踏入二○一二年，銀行開始積極做按揭，唔少購買力湧番出嚟，唔少住宅同埋商舖都有價有市，樓市百花齊放，相信今季樓價指數可以收復失地，錄得回升。

近幾年中央連番出招為熾熱樓市降溫，樓價升幅受到控制。據該報告，中國去年第四季嘅樓價指數按季跌4.3%，而比起前年同期亦跌咗2.1%。

愛沙尼亞排名第二

至於近年經濟新勢力嘅金磚五國，當中最為矚目嘅巴西，喺今次報告中排名第一，據報告所講，以叫價計，該國去年第四季樓價指數按季升4.2%，而比起前年同期升幅更達26.3%，升幅係咁多個城市中最勁。至於是次排名第二嘅國家係愛沙尼亞，佢第四季樓價指數按季升1.3%。