樓市出更：百貨舖隨時大執位

近幾年零售市場顯著復甦，帶動發展商旗下商場生意愈來愈好，唔少商場都會重新裝修，同埋重組租客，以增加商場收入。劉Sir收到風，已經喺荃灣區荃灣廣場開業最少廿年嘅日資百貨「吉之島」，租約快將到期，聽聞會搬去一街之隔嘅灣景廣場購物中心，商場業主恒地（00012）同劉Sir證實，已經同吉之島傾掂商場租約，不過就無講租期同幾時會搬過去。

其實，劉Sir呢幾年都聽聞吉之島會搬出，但一直無新消息，不過近排終於有突破性進展，消息話佢地已經「轉場」租用灣景廣場購物中心大樓面，問番商場業主恒地，佢地話吉之島同佢地傾掂租約，但實際租幾多樓面、租金幾多，以及幾時開張，就封晒嘴，話係商業秘密。

吉之島進駐 冷場變熱點

早喺廿年前，荃灣廣場一帶真係唔算好旺，不過吉之島進駐之後，就成為該區地標物業，成為朋友間等人嘅熱點。

荃灣廣場業主一方新地（00016）就依然話，依家同佢地傾緊續租意向，未有進一步詳情可以講，不過，劉Sir相信新地只係緩兵之計，相信佢地會喺吉之島走咗之後，搵旗下近排當紅嘅一田百貨填補部分樓面，亦趁機重組租戶，引入新租戶。

商場引新租客 提升分成

吉之島早喺九十年代初已經租用荃灣廣場，商場曾進行多次租戶重組，吉之島依然租用共四層樓面。唔少街坊都話，去慣荃灣廣場吉之島，轉地方會唔慣，但希望新店會有新景象。

近年商場業主不斷引入新租客，以提升分成收入來源，唔少大租戶都要面對執位嘅一天，其實吉之島呢類百貨商戶，近年都有唔少執位情況，好似佢地租用樂富中心約3層樓面已經十七年，大約兩年前都要轉租九龍灣大型商場，不過，今次就學精好多，新租約一簽就長達九年。

另外，宜家傢俬租用多年嘅九龍灣德福廣場2期其中3層，兩年前亦唔租，轉而租用區內另一大型商場。