Fundman睇市：旺旺有條件迎頭趕上

大市過去兩日累跌700幾點，驚醒不少人的牛市美夢。簡單去睇，上個月人行減存款準備金率之日，正是恒指高見21,760點之時，官員更放風降低市場對減息的期望，在經濟放棄保八，比市場預期低啲啲，通脹估計去到4%，比預期高啲啲之下，短期好消息出乾出淨，要靠瓜多過菜嘅一一年業績炒個市上去，睇怕並唔容易。

更重要係，近個多月交行（03328）、中國無線（02369）、碧桂園（02007）、友邦（01299）大股東AIG，都好似有今生無來世咁，等市況好些少立即伸手，尋日消息就話高盛本來正和客戶試盤，想把手上工行（01398）賣埋，睇尋日工行沽空6,945萬股，比前日大增5.04倍，消息唔似空穴來風。亦有賓架消息話本來有兩三間內房股都排住隊，等批CB或者新股集資，以應付內地樓市漫長的寒冬期，但唔少基金二月追咗一輪貨之後，都飽飽滯滯，加上集資活動不絕，睇嚟大市先來個健康調整，返到兩萬點樓下，比直接炒上兩萬二機會大。

iPad概念反高潮

前晚道指拗腰收復不少失地，然而納指卻跌近0.9%或者25點收市，報2,950點，皆因一隻股票已拖累12點之多，所講嘅正係市值一度超越5,000億美元，即3.9萬億港元的蘋果公司。今年華爾街炒iPad 3的熱情，實在不比旺角先達炒家遜色，蘋果公司股價由年初的405美元炒到最高見548美元，全球最大市值股票都升成咁，堪稱巨象起舞，周四零晨iPad 3正式見街，前晚股價開始見反高潮，出現sell on pad（fact）情況。睇番近期瑞聲（02018）被多間大行唱好，iPad 3概念同樣炒得不亦樂乎，今日看官若然見唔對路，記得要識落車。

近日市場廣傳繼上海及四川之後，房產稅會在其他內地城市試行，基於徵稅系統複雜關係，市場估計下一個開徵點會是首都北京。近日留意到不少官方評論，認為房產稅實施效果逐漸顯現，比起限購令，更能有效針對早就買了第二、三套房的既得利益者，故以房產稅取代限購令的呼聲日益高漲。

以上海為例，目前房產稅徵收方法是以每人居住面積超過60平方米以外的物業，按市值打個七折，再每年徵收當中的0.4至0.6%作為稅收，政策對囤積大量物業的投機者相當不利。雖然未知北京開徵房產稅的可能性有多大，但估計最受影響會是估值較高的潤地（01109），短期內睇少一隻吧。

旺旺（00151）去年純利4.19億美元，升17%，超出市場預測3.37億至4.09億美元的上限，主要原因包括三大主打產品米果類、乳品及飲料類、休閒食品類銷售，均增長強勁，同比升30%、30.6% 及36.1%，但更主要是毛利率下半年開始谷底回升。

官方估計內地通脹今年回落至4%，是頗保守的預測，過去幾年旺旺毛利率介乎34.8%至40.46%之間，筆者已多次提出，原材料價格高位回落對其毛利及業績的幫助極大，估計今年業績可以輕易升抵5億美元，甚至5.5億美元水平，以每次毛利回升周期估值可以達到30至36倍之間，今年落後大市的旺旺，有條件迎頭趕上。