股海實戰：粵海投資未算吸引

恒指衝唔上22,000點關，音樂一停，排山倒海嘅沽盤便湧至。尋日中資股跌勢頗為全面，執筆時見國壽（02628）發盈警，預計去年度淨利潤倒退四至五成，尋日其股價跌3.7%，沽空比率16%，睇怕今日一開市就要插穿22元關。其他內險股亦普遍低收，新華保險（01336）、財險（02328）及中國太平（00966）跌逾半成，平保（02318）及太保（02601）亦跌逾3%。

投資組合執位重來

前日阿莊沽出A50（02823），眼見A股繼續走低，形勢唔多盞，遂把心一橫繼續沽貨，以均價16.62元沽出中信証券（06030），另以均價1.57沽出上實城開（00563），如今手上僅餘金威啤酒（00124）同和電香港（00215）。金威會喺明日宣布業績，料出售資產計劃快有結果，而和電香港亦會喺本月廿日宣布業績，故睇情況定去留。

唔經唔覺，阿莊個組合都經已有八年歷史，回報有近七倍，個倉經已滾存至一個較大嘅晒士，阿莊心思思想藉着首季調整組合，重新開個新倉再戰股海，諗掂會喺度向大家公告。

想買防守性股份避避風頭，除咗三隻本地公用股之外，本來主要從事東江水業務、息率有3厘嘅粵海投資（00270）都可以諗諗，尋日股價收報5.18元，升2.17%。

之不過，觀其股價走勢，自一月底以來一直沿10日線向上，前日股價抽高至5.36元後即市調頭回試10日線承接，昨日雖逆市反彈，但14日RSI現背馳，若非震倉再上，就係托價派貨。再計現價往績市盈率13倍，東江水收益穩定，但公司亦兼營物業投資及發展業務，相信嚟緊業績波動主要視乎後者表現。畢竟以供水股嚟講，十零倍PE不過不失，所以請恕阿莊呢期保守啲，會等落番先前嘅橫行區4.5至5元水平才作考慮。

Tip股我至Top

阿May（2/29）Tip金威啤酒（00124）最多升14%

積奇（2/29）Tip華潤燃氣（01193）最多升12%