樓市出更：鄭躬洪睇死樓價一定跌

樓市顯著回暖，唔少人憧憬樓價有機會重拾升軌。不過，經歷過多次樓市起跌嘅資深投資者鄭躬洪認為，今年樓市依然「無運行」，尤其中細價物業，佢估計全年樓價會跌一成；佢又話，當歐債危機真正爆煲，樓市將會喺極短時間顯著回調，嗰陣將會係最壞嘅時候，亦係出擊時機，而入市就一定要揀市區樓。

鄭躬洪熟知市場變化，過去兩年不斷沽貨減磅。佢同劉Sir傾開，睇唔好樓市嘅主要原因有三個：第一，本港樓市過去升勢太急，未來必定價向下；第二，外圍經濟憂患滿布，屬小型經濟體嘅香港，唔可能唔受影響；第三，政府有意調控，加上政府換班在即，樓市一定無運行，尤其係中細價樓。

「雖然近期樓市成交增加，但都只係季節性小陽春，只係有小部分業主肯割價，其實依然有一大部分持貨能力好高。通脹咁犀利，業主根本唔會大劈價，成交量依然少；而且外圍經濟唔明朗、政府又樂意見到樓市回落，今年樓價勢必下調一成。」

最壞時勢掀拋售潮

鄭氏今年嘅投資策略係「按兵不動」，又認為即使樓價下跌一成，仍然係高位。佢同劉Sir分析，一旦最壞嘅情況出現，市場將會有一輪極短暫嘅非理性拋售潮，嗰時就喺出擊嘅時機，認為現階段「耐性」最重要。佢上年已經極少入市，僅買入灣仔樓花尚匯兩伙，涉資大約3,000萬元。

入市必揀市區樓

「入市最緊要睇地點，一定係市區樓，其次係價錢同發展商」。佢話獅子山以南嘅市區樓比較有保證，雖然新界區樓價或者受到鐵路效應帶動而走上，但非市區樓，只炒概念嘅風險仍大，個人唔會考慮。

鄭氏向來鍾情物業投資，佔個人投資組合比例高逾七成，並以豪宅物業為主。

現時佢持有嘅物業包括九龍站凱旋門、君臨天下，尖沙咀名鑄同灣仔會景閣等20幾伙，以及兩層灣仔寫字樓，市值合共逾4億元。