魚缸Blogger：信義玻璃抵買之選
大市尋日再升111點，高位離上周初大陰燭頂部只有44點，若大戶今日對二輪長期再融資操作（LTRO）嘅銀碼收貨，兩萬二大關值得期待。
績差股繼續大玩相反理論，資金認為壞消息出盡，行業將見底回升。雖然信義玻璃（00868）最近公布舊年少賺近兩成，但集團表示今年以來產品價格已見反彈，加上阿爺今年將力撐保障房同節能環保汽車，作為汽車、建築、浮法同太陽能玻璃業龍頭嘅信義自能受惠，加上講咗N次嘅分拆信義光能又久唔久拎出來翻炒，預測市盈率亦得七倍幾，現價絕對抵買。信義玻璃近日喺4.4元暫搵到支持後，尋日一連抽穿三條平均線，跟進阻力先睇5.4元。
