股海實戰：中航科工可逢低收集

周初恒指一跌原來係假象，唔少炒家都如夢初醒，尋日入場追貨，空軍見唔對路亦開始補倉。執筆時傳來LTRO放水額度勝預期，只要外圍市況配合，恒指見22,000點指日可待。但問題係，港股估值已唔算係便宜，之後會點走，倒令人迷茫，最怕係今年股市上半年經已透支升幅，則下半年日子難過！

踏入三月份，焦點都在兩會身上，尋日傳來內房產業擬草擬信件上書人大訴苦；另邊廂又有指兩會議題將包括物業稅。而近期內房股走勢就較想像中堅挺，更有大型房企宣布配股集資。

文化產業股遲早大炒

尋日提到嘅奶粉股果然有料到，澳優乳業（01717）及大慶乳業（01007）同升逾8%。繼續發掘新炒作焦點，近日文化部發布《十二五時期文化產業倍增計劃》，提出要重點突破包括演藝、娛樂、動漫、遊戲、網絡文化等十一個重點行業，目標係所管理嘅文化產業增加值至少要翻一番，文化產業股遲早會大炒一轉。

有炒家聞風先動，尋日翻兜第一視頻（00082），股價以全日高位1.3元收市。要搵相關概念股，本來已獲騰訊（00700）入股成策略股東嘅文化中國傳播（01060）亦符合條件，惜人氣不足，只能納入觀察名單。要炒不如從騰訊嘅衍生工具埋手，相信次季facebook掛牌前，其股價會繼續反覆做好。

市況持續高企，企業把握機會抽水亦無可厚非。最近中航科工（02357）按每股3.55元配售3.42億股H股，集資淨額11.78億元，作為發展戰略收購航空業務股權及一般營運資金之用。值得留意嘅係，呢批股份承配人唔多過十個，即係話冇批散出街，而承配人之一，包括現有股東及策略投資者歐洲宇航防務集團。

阿莊仲好記得，呢隻股○三年掛牌時，由於業務具獨特性，唔少投資者都寄予厚望，沒料到上市首五年都交白卷，表現與股東願望以至行業趨向背道而馳，直到○七及○八年連續兩年虧損超過10億銀，公司終於着手重組業務，成為轉捩點。呢次配股，也許可視為公司業務重納正軌，而投資者亦對其前景重拾信心的舉措，4元樓下可逢低作中長線收集。

Tip股我至Top

Sammi（2/27）Tip

華地國際（01700）

最多升10.7%

甘俊（2/27）Tip

宏華集團（00196）

最多升10.3%