炒家怕辣招摸貨大減75%

為遏止樓市炒風，政府由前年十一月二十日開始，重手推出物業轉售額外印花稅（SSD），務求令樓市可以健康發展。經過一年多時間，政府發言人尋日話，去到今年一月底為止，市場有98宗要交SSD嘅成交個案，涉及稅款約2,960萬元，而期內摸貨宗數大跌75%。睇嚟政府今次真係有料到，成功減退樓市炒風。

運輸及房屋局局長鄭汝樺昨日出嚟講，自從前年十一月推出咗SSD後，摸貨宗數由前年頭十一個月每月平均約320宗，減至由前年十二月至今年一月為止，平均每月得番約80宗，減幅足足有75%，暫時無計劃檢討。照劉Sir睇嚟，辣招真係已經減少咗樓市嘅炒風。

翠林揸一年 除稅照賺

鄭汝樺又話，SSD前年推出之後，至一月底已經有約98宗住宅成交要畀SSD，涉及金額成2,960萬元，但當中只有大約10宗係以低過入貨價賣出。值得一提嘅係，原來同期有成200宗成交屬於豁免個案，豁免原因包括近親之間轉售、賣方出售或轉讓遺產承繼物業等。

有相熟代理同劉Sir講，原來部分要交SSD嘅成交，稅款喺律師樓過訂時，已扣起所需金額作稅款，對大家都有保障咁話。

事實上，近日樓價再升，辣招盤成交已不時出現，好多扣除5%嘅額外稅款仍然有錢賺。美聯高文帆爆料，屯門翠林花園C座中層2室，上年二月業主用約195萬元入貨，住咗近一年後，以約221萬元沽出，成交價創同類單位九七後新高，呎價3,898元，即使扣除咗SSD同使費，業主仲仍然可賺約15萬元。

上水名都轉售蝕36萬

不過，個別心急嘅業主仍要蝕讓，消息話，上水名都1座中層單位業主，啱啱以約230萬元沽貨，比上年五月購入價帳面蝕約13萬元，計埋10%SSD至少蝕約36萬元。

另外，响旺市下，仍有個別低價成交，亞洲地產姚雲龍講，北角和富中心1座極低層單位，以近八個月最低呎價賣出，呎價只係約7,687元。