短炒倉：蒙能 趁旺炒一轉

有番咁上下股齡嘅，對於蒙古能源（00276）呢隻股票，相信都唔會陌生，但印象好壞卻可以好極端，主要視乎閣下係咩時候同佢扯上關係，如果係二千年科網熱潮，仲係叫新世界數碼嘅年代，又或者○七年剛轉型資源股之時，咁自然會係美好回憶，但若然喺其他時間沾手，相信睇法就會好唔同。

無論點都好，經過連續數年的跌浪後，蒙能近期確有回勇之勢，年初宣布終止收購新疆能源交易後，股價由0.6元低位升上0.8元橫行，上周五再次發力，升6.3%，以0.84元報收。

交投激增夠鑊氣

事實上，目前圍繞蒙能不乏利好消息，包括中期業績轉虧為盈、收購新疆能源告吹後向對方追討的2億元退款，公司已確認收到5,000萬元，餘款限令下月底清還；另外，蒙古胡碩圖公路工程完成，集團煤礦將可出口焦煤至新疆。不過，講嚟講去，炒得蒙能，都係貪佢夠鑊氣，上周五交投大增，有成8,285萬股轉手，係上周四1,780萬股嘅四倍以上，跟進炒一轉，博見目標1元，失守0.75元打靶。

蒙古能源（00276）

阻力位：1.00元

支持位：0.75元