Fundman睇市：數碼通賺價又賺息

上星期，當大家以為中國突然減存備金，加埋希臘獲得歐盟援助，兩個好消息沖喜，港股有機會向22,000點關推進，殊不知上周一裂口開21,760點之後，已成為全個星期高潮位，之後悶足五日，即使上周五升25點，收21,406點，全星期計數仲要跌85點，估唔到NBA神話林書豪連勝七場後斷纜，恒指亦在連升七個星期後，終於向地心吸力低頭。

資金流顯示，截至上周四的一周，環球股票基金錄得62億美元淨流出，是十星期以來最多，大部份來自美股，達58.42億美元，其次是日本股市，亦係連續十一個星期淨流出，更是一○年六月以來最長一次。資金怕歐洲經濟有排恢復唔到元氣，繼續由歐美等成熟市場撤出，一如匯市的「利差交易」，湧入新興市場，亞洲（不包括日本）淨流入3.72億美元，年初至今累積淨流入達31.56億美元。

傳統智慧話，資金市最好避免估頂、估底，但上星期港股沽空比例明顯收斂，反映連淡友都退避三舍，港股基金更唔理三七廿一，開始炒垃圾股、三四線股，冀追番一月及二月中上旬的失地。筆者相信，除非本周歐央行推二輪長期再融資操作（LTRO）有極驚喜的安排，否則過去四個月低位有買貨的，不妨酌量食胡，而非趁高興入市接火棒。

中期業績繼續標青

數碼通（00315）話取消又唔取消無限數據計劃，畀客仔怪責，基金股東一度怨聲四起，但股市始終向錢看，唔係為啖氣，隨着靚靚中期成績表曝光，上周五股價已一度浮返去16.32元的彈弓手前水平，你有你鬧，股價唔等人。

記得十年前，電訊業仲係競爭激烈，當時大部分人的手機，還停留「純粹打電話」的時代，轉台是家常便飯。然而，今日智能手機普及，3G都嫌唔夠快，遑論轉番2.5G，亦因此得四間網絡商可揀，價錢外，數據使用穩定性及速度都成為用家考慮的重要因素，否則最初數碼通話取消無限數據，就唔會日日有條人龍排隊自願提早續約。

上半年度數碼通賺4.75億元，增長48%，最叫人喜出望外的，是在極高滲透率的市場中，客戶人數仍有12%增長，高數據用量增加，全面綜合ARPU上升15%至277元，但由於毛利較低的手機及配件銷售大增2.7倍至22.35億，故上半年營業額升幅，遠遠拋離純利升幅，達83%，至50.6億元，智能手機的補貼亦錄得91.3%升幅，至4.63億元。

數碼通維持百分百的派息政策，中期息派0.46元，綜合大行預測全年盈利9.51億元，看來保守得過分，等於下半年盈利持平，史提芬估計較有可能逼近大行估計的11.04億元上限，等於十五倍市盈率或者6.67厘股息，在3G客戶及數據使用仲保持活力下，一三年將去到7.67厘，正係要求穩定現金回報，又需要穩步增長（估計兩年內不難維持10至15%）的一個好選擇，以6厘回報計，一三年前數碼通股價有機會見20.8元水平。

另一隻愛股和電香港（00215），會在下月二十日出全年業績，市場估賺9.82億元，值得留意是派息比例會否上升，分析員目前估計每股賺20.4仙，全年派息15仙。