股海實戰：中聯重科可逢低收集

呢期無論做好友抑或淡友都唔係咁自在，皆因恒指唔上唔落，波幅縮減而成交淡靜，與創逾半年高位嘅日股、創歷史新高嘅菲股，以及人氣回復旺盛嘅A股，形成強烈對比。

本周二就係期指結算，但似乎好淡雙方未必就可以分得出勝負。有研究術數嘅股友話，過咗三月五日驚蟄，大市方向會漸趨明確。阿莊就估計，嚟緊三月港股可能繼續斯人獨憔悴，唔跟區內其他股市走，皆因三月份香港本身有阿一選舉。

A股短期走勢樂觀

港股獨愁，但無改阿莊對A股短期走勢嘅樂觀睇法。上周，內地經濟學家李稻葵話，今年貨幣政策要走一步睇一步，首季預調微調係關鍵，仲話今年股市會有很好嘅發展。近周內地股市交投明顯上升，亦可視為升市指標。

呢期西部概念股當炒，見西部水泥（02233）升勢欲罷不能，上周五再升7%，收報1.88元，短線有勢叩2元關。除咗建材股之外，工程機械類股中，可以（目及）實中聯重科（01157）。

中聯重科主要從事研製應用於各類大型基建工程的高新技術裝備，而除咗內地市場外，公司亦已成功涉足國際工程機械市場。上月底，公司已就去年度業績發出盈喜，預計全年純利增長55至75%。事實上，去年中期公司營業額同比大增50%，如今看來下半年的增長勢頭未受內地經濟增長放緩影響。上周市場傳出公司擬收購德國同業，而上周五公司宣布為配合環衞機械產業戰略發展需要，擬以現金形式出資21億元人民幣設立子公司環衞機械，並會注入相關資產。

值得留意嘅係，屬同行龍頭企業、已喺內地掛牌嘅三一重工，據講正計劃喺次季捲土重來，重啟發行H股計劃，集資額超過200億元。中聯重科可以視為影子股，加上現價預測市盈率僅單位數字，揸得過，可採逢低收集策略，合理價14元，較大支持喺10.5元。

Tip股我至Top

藺俠（2/21）Tip友邦荷合購（14586）最多升69%

暴炒男（2/22）Tip青蛙王子（01259）最多升18%