樓市出更：要買上車盤未來大把貨

政府對增加中小型住宅單位嘅目標「堅定不移」，可以預見未來中小型單位落成量會非常充足。事實上，近年增加土地供應政策，已經令住宅動工數字顯著上升，單喺舊年獲准動工嘅住宅地盤，就已經可以提供到9,762伙住宅單位，而當中實用面積約752方呎以下嘅中小型單位，更加高佔約8,624伙，佔動工量超過88%，估計呢批單位可以喺兩年左右落成推出市場。

劉Sir近排同朋友傾開偈，都會講到樓市問題，雖然樓市係好似好番少少，但交投仍然唔係十分旺，可以睇到政府「辣招」已經收到部分效果，至於「辣招」之一嘅增加中小型單位供應，好似喺部分新發展地皮加入「限呎」、「限量」等發展條款，效果相信要二○一三至一四年先開始睇到。

431呎以下細戶達5703伙

睇番屋宇署數據，舊年總共批出35個住宅地盤動工通知書，提供近9,800伙住宅單位，而當中面積約752方呎以下中小型單位，就已佔去近90%，面積約431方呎以下細單位，就有約5,703伙。相信以正常起樓速度，未來一至兩年該批中小型單位就可以供應市場，屆時樓價相信會有明顯下調壓力，想上車，今年第三季可以睇住樓先，下年再扑錘入市。

豪宅大戶動工僅佔0.6%

講番未來中小型單位供應地區，新界區仍然係「重災區」，動工量達到4,815伙，反而港島及九龍區只有分別約1,539及約2,270伙動工。

至於有關數據都提到，面積1,722方呎以上豪宅大戶，舊年各區動工量加埋只有61伙，佔整體動工單位量只有0.6%；該類豪宅大戶集中在港島區及新界區，分別有22及31伙，九龍區只有8伙，當中涉及4個發展項目，大型豪宅單位咁少，可預見呢類單位未來樓價會做得唔錯。