股海實戰：光大國際估值看漲

內地一月份新增貸款額遜預期，市場流動性再次趨緊，上周五Shibor隔夜拆息抽高99點子至4.4958厘，翌日傍晚隨即傳來人行終於決定自本周五起下調存款準備金率0.5個百分點，乃近三年內第二次，料可向市場釋放4,000億人仔。魚缸有水到自當醒神，料有助提振兩地股市表現。

一路話呢次港股升浪21,000點阻力重重，點知上周成功突破，適逢外圍股市亦滿面春風，見恒指高位回吐壓力比想像中細，並企穩喺250日線（20,968點）之上收市，技術上確係牛氣十足，加埋內地放水，相信指數會繼續放紙鳶。但短期頂部難估，入市追貨要量力而為，已坐享厚利者，可以逢高減磅，留少部分資金短炒股仔。

港版恐慌期指登場

今日港版「恐慌期指」正式登場，所指嘅係恒指波幅指數期貨，以上周五收市恒指波幅指數22.75點，每點5,000元，若按最低按金比率23%計，每張入場費約2.61萬元。炒家既可多一瓣炒作，亦可藉着呢個新產品窺探大戶對港股未來波動幅度嘅睇法，炒輪一族想知窩輪引伸波幅合唔合理，亦多一個參考指標。

呢次升浪，電力、太陽能、風電、醫藥、家電、汽車、本地地產股都經已先後起動，但水務板塊似乎仲未真正大炒過。中國光大國際（00257）將於本月廿日宣布末期業績，此前可以多加關注。

光國目前主要從事環保能源、環保水務、新能源項目等業務，喺紅籌股之中，係少有已建立具規模嘅全方位環保業務，且具備穩定盈利表現嘅股份。截至去年六月底止，光國實現中期純利3.51億元，同比增長43%，每股盈利9.61仙。如無意外，估計全年度每股盈利可達20至21仙，現價預測市盈率約16.8至17.6倍。

「十二﹒五」期間，節能環保係國策重中之重，內地供水行業趨向採取階梯式收費，水價上調，加上行業改革，引進新技術，行業前景向好。光國已成功開發垃圾焚燒爐排爐及自控系統等環保設備製造業務板塊，正式進軍環保行業嘅中上游，且已透過投資德國光伏發電項目成功走出去，業務定位係同類股之中最優勝者，難怪股價唔經唔覺已重上去年次季水平。若然嚟緊公布嘅年度業績對辦，估值有上調空間，現價可謂攻守皆宜，向上睇4元心理關口，長期主要阻力仍喺4.5元，10日線及保力加通道中軸支持喺3.3元水平。

Tip股我至Top

藺俠（2/17）Tip

中移大和購（16650）

最多升15%

暴炒男（2/13）Tip

信利國際（00732）

最多升8%