樓市出更:九肚豪宅地靜雞雞搞大咗

政府今年公布嘅新勾地表,一方面就高調地宣布將大面積地皮拆細,有利細發展商參與,不過,另一邊廂又「低調」將一幅沙田九肚豪宅地皮由「細」變「大」,反映政府一方面想增加單位供應,但又發覺豪宅地太細會影響做價同吸引力,於是咪「靜雞雞」將九肚地皮變大,兼且取消埋限量條款。

沙田九肚第56A區B7地皮响新勾地表「消失」?發展局同劉Sir講,幅地無唔見到,只係併咗入去新供應嘅沙田九肚第56A區市地段第579號地皮度。

九肚第56A區B7地盤,原本只係麗坪路「S」彎位一幅轉角細地,總樓面8萬幾方呎,只係佔呢區原先供應樓面不足5%,不過,地皮合併咗之後,地盤面積去到35萬幾方呎,係九肚發展區最大幅住宅地。

洋房發展彈性大增

如果用番原先B7嗰幅地嘅地積比率推算,估計新地皮可建總樓面約莫有53萬方呎,兼且無埋「限量」、「限呎」條款,發展彈性大咗,起到豪宅洋房嘅機會高啲,地價當然可以比「限量地」高好多,保守估計幅地每方呎樓面地價可以去到七千幾蚊,地皮估值大概有三十幾、四十億元。

區內七地勢成指標

九肚新發展區首幅售出嘅九肚第56A區A地盤,舊年八月初由信置(00083)、嘉里建設(00683)同萬泰地產合組財團响政府賣地場上以開價55億元「一舉」投得,每呎樓面地價只係5,332元;賣完呢幅地無耐,地政總署就收到有財團試勾隔籬嘅B3及4地盤,不過最終幅地勾唔到,但可以反映到九肚地已經受到發展商注意。

九肚新發展區潛力非常優厚,話晒鄰近係九肚山傳統豪宅區,有廠家同中港商人等捧場客需求,依家勾地表有7幅九肚地皮,劉Sir預計,今年該區會成為勾地焦點之一,十年左右可成區內指標豪宅區之一。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

劉Sir

九肚新發展區潛力優厚,而鄰近的九肚山是傳統豪宅區。(資料圖片)

九肚山