Fundman睇市：地產股續有反彈水位

港股向來是投機者天堂，大上大落可是恒常的特色，連續兩星期，在兩萬一關口下面頂到實，終於證明係好友請君入甕的蠱惑招數，借歐債拍得好，周小川會繼續以人仔支持歐元買歐債的言論，港股早市輕微高開後，好友完全主導大市，恒指最多升485點，收市升447點，報21,365點，主板成交比前日大升四成七去到822億元。

前日先講過唔少本地基金手上揸貨唔多，結果大市由16,170點抽上嚟，整體手持現金比重，一直無大幅回落，只係由年初的4.4%回落到4.2%，眼見市況升唔停，惟有由高防守性股份，轉落去捧落後股、高beta股甚至係垃圾股。但昨日的雞犬皆升市況可以維持幾耐？筆者無水晶球，最終仲要睇市場錢多抑或傻瓜多，但尋日收市見到沽空數字，隱然覺得唔多妥，沽空佔主板成交大減，由8.67%跌至7.01%，是一月十六日以來最低，尋日大市升理應空軍有更大誘因入市，沽空縮水，可能意味連淡友都轉軚睇升，短期或者會來個技術調整。

SSD帶動一手樓銷情

去年，特區政府推額外印花稅（SSD）壓抑炒風，樓市交投急降，然而卻未對樓價造成太大衝擊，主因是低息持續，業主持貨成本低，這或許不是大部分人甚至政府意想得到。反而二手樓成交就受SSD影響，因新置業業主放盤的投機成本極高，造成供應減少，直接造成交投癱瘓，銀行追加按揭首期成數，也令換樓客大減，結果二手樓市陷入沙士後最膠着的悶局，衍生的副作用，係益晒一手樓市場，尤其樓花投資者，因為收樓後再放盤需要一段時間，對SSD抗拒也較低，去年下半年開始，多個新盤銷情暢旺，同悲觀的股市形成強烈對比。

去年底筆者提出，供應一手樓的地產股，按理不應和九八亞洲金融風暴、○三沙士和○八金融海嘯時期相提並論，出現平均三至四成的資產折讓，結果去年九月低位，地產股指數累積反彈44.5%，跑贏恒指的32.1%升幅。

尋日早上八到消息，話幾間外資行接到長倉基金地產股的買盤，且晒士唔細，收市見新地（00016）成交額創十四個月新高，可見消息無誤。話說回頭，新地近兩日的升幅唔細，想上車的，不妨先等一等。中長線睇，過去十幾年幾次樓市起落，恒生地產股指數市帳率低點往往可以去到0.6至0.7倍水平，假設去年十月見0.7倍是今浪低位，之後的小陽春可以去到甚麼境地，值得期待。

回顧二千年、○四年後沙士及一○年後金融海嘯三次小陽春，恒生地產指數市帳率分別反彈到1.6、1.3及1.4倍水平，歷時分別為5季、3季及4季。大家都知道，香港樓市真正低位，到○三至○四年才出現，二千年多得有科網熱，1.6倍或者是一個例外，但之後的1.3至1.4倍，應該較具參考價值，揸了地產股的看官，或者可將之視為今次小陽春的終極目標。

新地過去兩日累積8%升幅，以紅底股而言認真少見，現價新地市帳率0.9倍，較十五年平均值1.21倍，折讓25%，較穩陣的投資者，或者可以等埋廿八號業績，睇清楚至入市。