股海實戰：希慎興業早買早享受

港股尋日喺外圍升市帶動下，終於成功突破21,000點大關，全日高位見21,403點，收報21,365點，升447點，成交回升至824億元，乃過去七個月恒指首次重上牛熊分界線。魚缸中人信心大增，見多個板塊起動，建材、水泥、基建等落後股亦急起直追，周初阿莊話要（目及）實嘅本地地產股就繼續發力，尋日推介嘅美聯集團（01200）升4%，收報5.1元，好在尋日上晝早段隻股仲未動身，仲來得切以平均價4.92元掃入15萬股短炒一轉。

後市去向還看歐債

還記得去年「十．一」長假後，國家隊入場吸納內銀A股，及後傳來人行調低存款準備金率，以及溫爺爺拋出「微調」論，阿莊喺去年十二月初曾講到，參考○八年九月中央救市，由出招到股市真正起飛要六個月時間，此期間可不用心急高追，逢低吸納。過去呢四、五個月，阿莊都有信心動搖嘅時候，但始終未有沽出手持嘅A50（02823），怕嘅就係一旦A股真係重現升勢，趕唔切上車。

究竟後市如何，阿莊都唔想諗得太複雜，總之影響好淡形勢嘅最大變數，就係歐債危機。只要歐債問題獲得緩解，則看官不妨順勢炒；惟一旦歐債危機又再惡化，則唔好理咁多，沽貨離場觀望。

繼續睇吓地產股，上周有探子回報要（目及）實隻希慎（00014），諗住咁大隻股唔慌行得快，於是冇記喺心，點知連現兩支大陽燭，尋日高位見33.6元，收報33.2元，升4.2%，已確認重上250日線，真係大嘆走寶！

貴為銅鑼灣大地主嘅希慎，今年嘅焦點乃計劃喺夏季開幕嘅希慎廣場。由於該項目係香港首幢獲得美國綠色建築協會LEED「白金級」水平嘅建築項目，勢成銅鑼灣鬧市嘅綠色地標建築，估計租金可較同區平均水平享有一定溢價，並有望帶動集團區內其他收租物業整體租金水平上升。雖然相關收益可能最快要到明年度業績先至反映出嚟，但炒股唔係炒往績，而係炒前景，到真正成事實，可能經已到價。該股將於三月八日宣布業績，不妨留意該項目嘅實際進度。阿莊相信，喺項目正式開幕前，希慎股價會繼續反覆向上，至於目標價，可參考截至去年六月底止嘅NAV43.67元，29至30元水平已由阻力位變成支持位。

Tip股我至Top

藺俠（2/10）Tip工行中銀購（15138）最多升60%

姚午齊（2/9）Tip勝獅貨櫃（00716）最多升11%