樓市出更：街坊舖租金大倒退

銅鑼灣等一線零售區，連鎖大型商戶爭先恐後响區內以高租搶位，舖租大多以倍數上升。不過，以民生消費群為主嘅二、三線區舖租，情況就截然不同，個別更出現減租個案，減幅由約一成至三成。其中深水埗大南街有地舖租金較之前低咗三成幾。有代理話，二、三線區商舖租戶以小本經營為主，加上有最低工資，成本上升下態度較審慎，唔會高追舖位。

代理同劉Sir講，深水埗大南街商舖租戶大多以時裝、布料及食店等商戶為主；而該等行業來貨唔少係從內地進口，近年人民幣升值，間接令營運成本增加，為減低成本，部分業主為求盡早租出舖位，都願意減租。

大南街舖跌租31%

而上述出現減租嘅舖位為大南街單號地舖，面積約800方呎，原本由布行租用多年，月租約4.5萬元，呎租約56元，早前有時裝店洽租，最終以每月約3.1萬元承租，呎租近39元，減幅約三成一。而同區長沙灣道一個單號地舖，面積只係350方呎，新租客同為時裝店，新月租約4.5萬元，呎租約129元，較之前亦低約25%。

民生商舖為主嘅土瓜灣區，區內部分商舖業主面對商戶議租空間較大嘅問題，為省卻拉鋸時間，都肯主動減租。聽講馬頭圍道一個雙號面積1,200方呎地舖，前租金每月8萬元，剛獲新租客只以每月6萬元承租，呎租50元，較前租金少25%。

舖壇資深投資者黃海明話，二、三線區商舖租金回落，相信屬個別例子，估計除咗係業主想快啲租出商舖外，亦唔排除係新租客條件更佳，可提升物業市值，故業主都會少收租金，以換取較優質租客。

美聯旺舖盧展豪認為，二、三線消費區商舖租戶以小本經營為主，租金佔成本較大開支，再加上早前落實最低工資，小商戶對開業或擴充都轉審慎；個別業主願輕微調低租金以求盡早租出舖位。