短炒倉：中油燃氣 二度開車

尋日大市雖然一如市場預期，成功升抵21,000點，可惜未能企穩，倒跌收場。眼見闖關未成，資金轉投三四線，炒得不亦樂乎，或者未來幾日市況都會是細價股天下。

舊年尾新奧能源（02688）夥拍中石化（00386）高價收購中國燃氣（00384），令一眾燃氣股齊齊炒上，但隨着有關收購陷入膠着，幾隻燃氣股亦跟住回落牛皮。雖然上周中燃方面打出員工牌，話收到約4,000名員工簽名反對收購，但昨日中石化和新奧方面就表示，將尋求會晤中國燃氣董事會。志強認為，收購談判關鍵不外乎價錢，最緊要係仲有偈傾。而尋日新奧逆市做好，連同華潤燃氣（01193）、中油燃氣（00603）同昆侖能源（00135），等都有逾1%升幅。

睇番志強十二月中推介嘅中油燃氣，當時目標睇0.7元，之後在上述收購消息傳出後，股價乘勢炒上最高0.71元，之後就在0.64元上下窄幅橫行，不過近兩日見回勇，昨日逆市微升0.01元，收報0.68元，成交亦同步配合增加，似有二度開車迹象，如能升穿前高位0.71元，可望向0.8元推進，支持位睇0.64元。

中油燃氣（00603）

阻力位：0.80元

支持位：0.64元