股海實戰：MI能源值得小注

呢頭講完今轉升浪可能上到21,000點，尋日就即刻到位，恒指高開258點，見全日高位21,015點後回落，埋單倒跌47點，報20,709點，成交722億元。不過，單係中移（00941）同聯通（00762）跌幅已相等於恒指跌37點，所以大市實際沽壓又唔係想像般咁大。

三月初內地召開兩會，阿莊聽表叔線話，今年比較特別嘅係撞啱政府換屆年，相信點都要做番好些少嗰局面，好展示現屆嘅功績，確保換屆順利。所以表叔話，本來諗住二月股市會先高後低，依家睇落兩會前A股即使唔大升都唔會再大跌，若然係咁，港股又未必須要睇得太淡，真正較大調整浪可能要喺三月先見咁話。係真唔係，就當多個消息參考，見步行步。

航運股升完可再升

波羅的海乾散貨指數不斷走低，近日中國船東協會表示，當前船企面對嘅困難前所未有，正着手準備向中央呼籲出台對策以助解困，偏偏見到啲航運股靠炒美國經濟復甦升完可以再升，尋日見中海集運（02866）、中國遠洋（01919）、中遠太平洋（01199）及招商局（00144）升幅介乎4至5%。咁嘅現象，也許可以股市慣常走先經濟六至九個月來解釋。若然半年後睇，首季航運股升得有道理，咁接下來陸續跳出低谷嘅，相信仲有資源、工業同出口股等股份。

此外，美國經濟復甦，亦有助改善能源業前景。講到能源股，MI能源（01555）上周四現十字星，跟住嚟兩支大陽燭，尋日成交放量，成交股數3,098萬股，乃自去年十一月上旬以來最大單日成交股數。

舊年十一月，某著名基金減持MI能源至低於5%，相信要沽嘅年結前經已沽得八八九九，加上公司宣布收購美國一油氣租約區塊嘅工作權益，以及內地調高石油暴利稅上調起徵點，均有助改善板塊氣氛，故見自上月以來其股價重展升勢，只係目前14日RSI經已升至73，故宜候回吐守穩2.38元下可小注一試，上望去年八月初下跌裂口位2.76至2.88元。