實用面積計價二手樓都掂

運房局早前就規管一手銷售立法進行為期兩個月嘅諮詢，上個月底正式結束。但劉Sir八到，原來英國皇家特許測量師學會（RICS）同政府傾掂數，會喺今個星期五或以前遞交有關建議書，包括贊成沿用實用面積計算呎價，而且二手都啱用。地產建設商會尋日就發表聲明重申立場，話唔反對使用實用面積同埋立法規管未建成物業。

早前，RICS香港分會前主席蘇振顯同劉Sir講，該會已經同政府溝通咗，會喺最遲今個星期五提交有關規管一手買賣建議，並透露該會支持以實用面積量度呎價。對於市場唔少聲音都話可以加埋建築面積畀市民參考，佢就話，建築面積無實質定義，加入樓書供參考未嘗不可，但強調價單就應該劃一用實用面積計算，以免混淆資訊。

市民畀錢可以查到

唔單止一手樓，佢話有關實用面積仲可以規管埋二手市場，仲寫包單話實行起嚟唔會太困難，因為差餉物業估價署有齊所有二手屋苑實用面積資料，市民畀少少錢就可以取得。佢仲爆料話，其實各大地產代理一早畀錢買齊有關數據，市民買樓不妨查詢一下。

另該會並唔贊成發展商為旗下新盤進行內部認購，因為難以確認成交真實性，部分可能只係發展商銷售伎倆。同時該會亦贊成誤導買家刑事化，但要進行深化，分清楚公司邊個要「孭飛」。仲話建議書內容全數以公眾利益為先，該會同地產代理監管局有密切聯繫，將會畀多份地監局參考。

至於RICS香港分會主席關健補充，今次新勾地表將部分土地拆細屬好事，可回應市場需求，同時較支持市場自由價格，但政府亦要有底線，不可賤賣土地。

地建會重申不反對

此外，地產建設商會同劉Sir講，就近日有若干媒體對該會所作嘅失實報道，重申立場以正視聽。該會話立場始終如一，無反對使用實用面積，亦無反對立法規管未建成物業。作為行業代表，有責任對政府作出回應，如實反映業界意見。