短炒倉：中通服 落後可跟進

身邊不少朋友幫襯嘅數碼通（00315），尋日終於宣布取消手機無限上網月費計劃，未來上限將降至只得2GB，但收費依舊。消息一出，一眾用家自然甚多意見，志強就覺得，網絡商夠膽鍊得咁盡（收全費但只畀2GB你用），當然係有所恃，皆因人人都已經習慣手機上網，真係唔怕你唔用。

供股影響告一段落

同一道理，內地近年智能手機市場發展迅速，三大網絡商的3G用戶都大幅增長，對相關基建設施的投入亦有增無減，為中通服（00552）提供有利經營環境，其截至去年六月底止中期純利升16.3%，至10.53億元人民幣，毛利率升至15.7%。但由於進行十供二供股關係，令中通服股價受壓，昨收3.49元，仍然處於近兩個月的低位水平，不過隨着其供股權已完成買賣，有關負面因素告一段落。昨日一眾通訊設備股見炒落後，中興（00763）、TCL通訊（02618）及DBA電訊（03335）等，升幅3至5%不等，中通服亦可望進一步做好，上望4元，支持位睇供股價3.19元。

中通服（00552）

阻力位：4.00元

支持位：3.19元