Fundman睇市：旺旺又到入貨時間

昨日午後，中港兩地股市突然發威，由一些外電報道，話有外匯交易商傳出人行傍晚可能會再減存款準備金率，姑勿論係真係假，股市投資者選擇了相信，滬綜指升44點，報2,312點，再次重返2,307點的強大阻力樓上，港股的好友亦都一吐烏氣，恒指再升406點，報20,739點，逼近去年八月的巨型下跌裂口21,017點。

前日溫總先重申打擊房地產投機活動的言論，筆者就唔多信，人行會立即去減存款準備金率，否則過年前就唔使低調地透過停發央票放水來紓緩流動性緊張問題。講到底，A股升主要係落後外圍太多，在市場開始炒二輪長期再融資操作（LTRO），歐息回落、歐股勁升下，追補應有升幅而已。

升市莫估頂，到底恒指可以升到幾高，250日線或者是比較公認的重要阻力，由昨日沽空佔大市成交由9.21%再升至9.75%，看來淡友一日唔棄械投降，挾淡倉的活動都仲會繼續。若然個個淡友都將止蝕放喺250日線（21,080點），短期借美國QE3、歐股LTRO2，好友再下一城，攻破阻力令恒指迅速再升一千幾百點都講唔定。

大戶睇淡周大福

講開沽空，淡友尋日多兩隻可沽空股份，分別係周大福（01929）及新華保險（01336），兩股表現有雲泥之別，前者逆市插3.9%，華保卻勁升8.5%。史提芬聽聞借貨行開出條件都幾辣，前日兩隻股票借貨叫價都要年息6厘樓上，但周大福仲係奇貨可居，早早借罄，事緣近日不少大孖沙睇淡內地奢侈品消費市場所致，沽空股數1,946萬股，佔全日成交36%，比華保的2.5%高一截，可見大戶睇法。

華保有消息配合先避過糟質，包括一月保費增長數字優於全行，另外，昨公布準備發債150億元人民幣，分析員估計償付能力將大大改善，最後一點係幾隻保險股中，因策略股東結構影響，華保向來較A股折讓較大，睇番平保（02318）H貴過A，國壽（02628）及太保（02601）幾乎平水，消息話近日有內地基金睇中，保守一點，折讓如收窄至一成，不能排除今浪見34至35元。

旺旺（00151）又按傳統在假期後出清為春節生產的額外庫存，過去幾日股價由最高7.93元回吐至6.83元，調整幅度達13.8%，筆者相信會係一次長線的入市機會。今年內地通脹肯定由高峰回落，估計全年在3至4%左右，旺旺生產米餅同飲料等產品，白米及香精等原材料價格對毛利率影響甚大，以○八年至○九年為例，內地通脹由高峰8.7%回落到2.5%樓下，旺旺毛利由37.21%擴濶至42.08%。

一一年上半年，旺旺毛利率比上個通脹周期，受到更嚴峻衝擊，跌到32.98%，但隨着通脹回落，大行估計今年可以逐步回歸常態，重返37至38%水平，以一年35億美元銷售額，每1%改善毛利多出3,500萬美元，或者1,200萬至1,300萬美元純利（額外2.4至2.6%增長），幫助之大，是不言而喻。旺旺向來不屬於低估值股票，一二年市盈率24.2倍，但通脹回落，未來兩年盈利增長速度加快，目前僅僅在歷史平均水平，看來今年股價仍有相當吸引的上升空間。