股海實戰：中興通訊有水位再彈

美股前晚高收，加上市場盛傳內地短期內會上調存款準備金率，A股回勇，帶動恒指一舉突破20,500點關，收報20,739點，升406點，成交753億元。技術上，恒指自上周五升穿20,500點後，調整數個交易日便向上突破，爆發力不容低估，繼續審慎唔做嘢有點不切實際，惟有因應市況突破略作修正，限住注碼跟炒。

數碼通（00315）率先取消無限上網計劃，股價飆13%，雖然執筆時尚未見本周二阿莊推介嘅和記香港（00215）有相類似行動，但相信只係遲早問題，加上股價跟住升，所以有理冇理跟上車，以平均價3.37元買入10萬股。

新華保險強勢破頂

此外，阿莊多次提到嘅新華保險（01336），呢兩日後抽力度足，尋日仲穿頂，走勢令人鼓舞，加上尋日該股首日開始納入可沽空名單，但沽空股數僅23萬股，反映借貨貨源有限，再諗起表叔話隻股街貨少可挾上35元，為免走寶，硬着頭皮入市場買兩萬股。

自去年中以來，恒指反彈一直受制於250日線，目前該線處21,046點，而去年八月初下跌裂口則介乎20,944至21,645點，且看今轉能否突圍而上。

論落後，其實電訊設備板塊亦好耐冇炒作，近日多家券商就為中興通訊（00763）發報告，其中里昂將中興評級由「跑贏大市」調高至「買入」，目標價27.3元；大摩、花旗及瑞信嘅目標價分別係28.5元、28元及32.5元，睇得最淡嘅係美銀美林，目標價得24.7元，但評級仍為「買入」。

行業研究報告顯示，以手機出貨量計，去年中興全球排名第五，市佔率4%，與排第四嘅LG市佔率僅差0.1個百分點。咁講法，今年其手機業務要做全球老四唔係難事。至於大型電訊設備業務方面，相信今年三大電訊商嘅資本開支有增無減，呢方面展望穩定。

再睇股價，由上月中旬高位24.8元回落至前日低位20.75元，調整幅度有16%，尋日反彈上22.25元收市，升5.45%，成交3.26億元。基本上，主要阻力位仍然喺250日線24.68元，現價博試阻力位仲夠水位，支持位20.75元。